Entiero di e tres victimanan di accidente di Seroe Colorado ta diasabra

ORANJESTAD – Entiero pa e tres victimanan di e accidente horibel di diadomingo pasa, Carolina Wouters (34) su ruman Mirella Wouters (35) y yiu di Mirella, Rendrick Wouters (2)  ta tuma lugar mayan diasabra dia 8 di oktober 2022. E acto di despedida ta tuma lugar for di 2 or pa 4’or di atardi na misa Santa Theresita na San Nicolas, y e acto di cremacion lo tuma lugar den seno familiar. Diabierna for di 7’or pa 9’or di anochi tin oportunidad pa condolencia. 

E ACCIDENTE

Manera ta conoci tabata diadomingo mainta ora cu a consecuencia di un accidente horibel di auto net pafor di Colony na Seroe Colorado, e tres personanan menciona a perde nan bida, mientras cu 3 persona a keda herida atras. E chauffeur cu ‘ta sospecha’ di a causa e accidente, tambe ta herida y awe mainta ainda tabata hospitalisa, bou vigilancia policial. Esaki pasobra e ta un sospechoso di husticia pa OM, cu acusacion di ‘dood door schuld’.