Otro luna NASA ta lansa satelite di tempo JPSS-2 cu Edward Cheung a traha ariba

VANDENBERG – Otro luna NASA ta lansa un satelite di tempo (weather satellite) y loke ta haci esaki interesante pa nos, ta cu e Arubiano Edward Cheung ta esun cu a traha ariba pa e ultimo añanan den tur secrecia. Ta trata di e satelite JPSS-2 cu tin cu bula rond full mundo pa gara dato di tempo. Interesante ta cu e ta wordo lansa den e parti sur. Segun splicacion di sr Cheung, e no ta safe pa lansa esaki for di Florida pues ta usando e base di forsa aereo mericano na Vandenberg na California. Riba un serie di potret por mira e momento cu e booster di e pa lansa e satelite ta yegando e base cu boto, y tin e cono cu ta proteha e nave durante lansamento. Y tin tambe e satelite mes cu a yega den un container cu nan a transporta cu un truck grandi di Arizona pa California. Pa cu e trabou aki, Cheung mester a biaha pa California cada luna pa traha riba dje. Y otro luna e mes ta biaha atrobe pa California (e ta biba den e parti Oost di Merca, na Washington) pa ta presente durante e lansamento. E tabata responsabel tambe pa e Telescopio Hubble hopi aña pasa y ta un ingeniero pa NASA pa mas di 20 aña caba.