Venezuela tabata kier pa anuncia reapertura di frontera y despues negosha!

ORANJESTAD – Presidente di Venezuela Nicolas Maduro tabata kier pa Aruba anuncia reapertura di e frontera pronto, pero sin prome acorda e condicionan cu lo a haci e reapertura posibel. Asian e prome mandatario di Aruba Evelyn Wever Croes a ‘confesa’ na e portal local latino ‘Impacto Latino’ e siman aki. “Autoridad Venezolano recientemente a pidi nos pa haci un declaracion cu ta bay habri frontera, pa despues nos sinta y negosha. Nos no ta traha asina” e mandatario a sigura e periodista di e portal, Jhon Watts. 

KICO MESTER PASA

Wever a splica cu prome cu habri frontera, mester negosha entre e partidonan pa garantisa condicionan cu ta garantisa responsabilidad y seguridad pa ambos pais. “Si nos anuncia un reapertura sin cu tin algo regla, esey no ta transparente y ta crea speransa falso pa e comunidad” e mandatario a sigui bisa. E la sigui bisa tambe cu Aruba ta pro pa habri frontera. “Aruba kier habri frontera pero nan mester ta bou di condicionan bon defini” e la sigui bisa. E mandatario a probecha pa refresca memoria di tur hende cu inicialmente no ta Aruba ta esun cu a cera frontera sino e propio Nicolas Maduro cu na 2018 a haci esaki, acusando Aruba di ta hortando e koper di Venezuela”. Mientrastanto Aruba a (manera e portal aki a raporta caba) bolbe prolonga e ciere di frontera cu Venezuela te por lo menos 10 di December 2022. Cada tres luna ta prolonga e cierre.