Investigacion ta continua riba caso di hoben cu a hoga den pool na Palm Beach

ORANJESTAD – Un dia despues cu a raporta e caso tragico di e hoben Daniel Perez-Cujia di 24 cu a hoga den un piscina den fin di siman, e motibo exacto no ta conoci. Tin varios versionan ta circula, unda cu uno ta bisa cu tabata hunga e wega di ken ta keda mas largo bou di awa, mientras cu otro version a bisa cu e hoben a cay, dal su cabez y hoga den e piscina. Autoridad a confisca e curpa pa determina kico por a causa e morto di e hoben aki. NoticiaCla ta manda palabra di condolencia na famianan di e fayecido. 

E CASO

Manera a raporta ayera caba, tabata ayera (diadomingo) mainta pa mas o menos 06.05 central di polis a wordo informa cu un persona lo a haya problema den un pool na un cas na Palm Beach y no ta duna señal di bida. Un rato despues melding a drenta for di hospital cu a trece un mucha homber cu no ta duna señal di bida y cu aparentemente a hoga den un pool. Mesora Central ta despacha un patruya di polis pa hospital y aki 06.42 Dokter Kuip a constata morto di Daniel Perez-Cujia, naci na Aruba di 24 aña di edad.  Recherche di districto di Noord y Departamento Tecnico di Cuerpo Policial ( BFTO) tambe a presenta na hospital y tambe a bay na e cas na Palm Beach caminda cu e caso aki a sosode pa haci e interogacion y investigacion necesario. Departamento di slachtofferhulp tambe a presenta na hospital na unda a brinda yudansa y sosten na e famia di e fayecido.