Van Huffelen: No a dicidi ainda si ta converti sosten di likidez den un regalo

DEN HAAG – Mientras cu e ta compronde e pregunta, awor ainda esaki no ta algo cu gobierno Hulandes a tuma un decision ariba. Asina e secretario di estado Hulandes Alexandra van Huffelen a contesta NoticiaCla awe mainta durante un conferencia di prensa despues di e RMR na Den Haag, riba e pregunta si Hulanda ta pesa pa converti e prestamo pa sosten di likides den un ‘regalo’. Otro aña October, Aruba tin cu paga e prestamo aki bek den un solo tiro. 

EDGARD VROLIJK

E pregunta di NoticiaCla tabata a raiz di e ponencia haci e siman aki pa presidente di Parlamento di Aruba Edgard Vrolijk durante e reunion di IPKO na Den Haag, unda cu e tabata kier sa cua parti di e prestamo cu Aruba a haya durante e pandemia ta of por bira un regalo (gift) y cua ta keda un prestamo. Vrolijk su argumento tabata e.o. cu e ta haya e trato ‘unfair’ mirando cu tin paisnan cu ta haya regalo di placa di Hulanda, mientras cu ora cu ta trata nos, e ta bira un ‘prestamo’. 

VAN HUFFELEN TA COMPRONDE DESEO DI VROLIJK

E mandatario Hulandes a bisa cu e decisionan cu a cay ta cu ta duna Aruba ( y e otro islanan) un prestamo, cu tin cu wordo paga den un solo tiro otro aña October. Pero tin combersacionan cu tin cu cuminsa ainda riba e posibilidad pa refinancia e prestamo(debe) aki, ya cu tin deseo pa esaki di parti di e islanan. Den cuadro di esaki, e mandatario Hulandes a bisa NoticiaCla cu e ta compronde e deseo (di sr Vrolijk:red) cu e paisnan en cuestion ta pidi pa converti e placa den un regalo. “Pero pami, esey ainda no ta alcaso aworaki. Nos tin cu trata prome e presupuesto 2023 y e prestamonan ey. Pero ta comprendibel cu e pregunta ey tey!” e mandatario a finalisa bisando. 

PAKICO OTRO PAISNAN SI

Un di e criticanan constante ta cu Hulanda ta hopi generoso cu ‘parti placa’ pa otro paisnan,- manera ora cu a duna Colombia 40 miyon euro algun tempo atras y tambe paisnan manera Spaña, Italia y Ucraina -, pero ora cu ta trata nos, e placa ta bira un ‘prestamo. Riba e pregunta ey, e mandatario a core bisa cu no mester lubida cu den tempo di pandemia Hulanda no solamente a presta placa pa ‘rescata e economia’, pero a duna (regala) hopi placa den forma di pakete di cuminda, remedi y pago di mediconan etz. “Ta trata di centenares di miyones” e mandatario a subraya. Pues e no ta haya cu por bisa cu Hulanda ta solamente presta, y no a duna ayudo. E mandatario a recorda ora cu tabatin horcan na St Maarten, a yuda cu hopi placa pa recuperacion (500 miyon euro). Di otro banda, e mandatario ta reconoce cu e islanan en cuestion, (Aruba, Corsou y St Maarten), tin un otro structura di gobierno cu Hulanda compara cu islanan BES y nan ta goza di e sistema Hulandes pasobra nan ta parti di Hulanda. “Claro cu ey bo lo wak un diferencia!” e mandatario a sigui bisa. “Y esey ta diferente y esey mi ta di acuerdo cu bo” e mandatario a contesta NoticiaCla. Di otro banda ora cu a coregi cu kier men paisnan manera Colombia y otro paisnan grandi manera Ucraina. Aki e mandatario a bisa cu tin diferencia si cu e paisnan ey y ta haya dificil pa bisa algo riba e parti ey. Pero ta claro cu nan ta sostene Ucraina den e guera horrible contra Rusia y esnan cu ta carece di nan libertad. “Claro cu nos ta yuda ey!” e mandatario a finalisa bisando.