Arubiano Aaron Hosé na Florida: Ian a yega cerca nos como tormenta y no horcan

ORLANDO – Manera por spera, tin varios Arubiano cu ta biba na Merca y den e caso specifico aki, hopi ta biba den e estado di Florida. NoticiaCla tabatin contacto cu uno particularmente cu ta biba na Merca for di añanan 90, y di cual e tin e ultimo 13 añanan bibando cu su casa na Orlando, y a experencia e pasada di e horcan Ian. Ta trata di e conocido productor cinematografico Aaron Hosé, cu su casa Brigitte. Ambos Rubiano, a splica cu danki Dios no tabatin hopi daño unda cu nan ta biba, sino si hopi awa. Den nan caso, e caya dilanti nan cas y henter e barrio tabata manera un rivier, pero riba caminda so, pues nan por a drenta nan cas ok. Y como cu nan tin un SUV, nan por move basta bon. 

E EXPERIENCIA

Segun Aaron, nan no tabata mucho nervioso. “Nos a prepara manera mester tabata ya cu a pronostica cu e wowo di horcan lo a bin directamente pa nos” Hosé a cuminsa na splica. “Pero e pronostico tabatin e despues poni pa yega como un tormenta tropical envez di un horcan. Esey tabata un alivio”. E unico preocupacion tabata e awacero. “Nos tabatin hopi awacero te na e punto cu e la causa inundacion den nos area. E tipo di inundacion cu nos tabata experencia como mucha na Aruba cada bez awacero cay duro. Tur caminda unda cu bo mira, ta parce un rivier awor” Hosé a sigui splica. 

E AWA

E coriente di awa a subi te na e base di nos entrada di cas (trottoir), pero afortunadamente no a yega e porta di nos cas y drenta paden. Algun otro cas den nos bario no tabatin e mesun suerte” Hosé ta bisa. E otro cos cu nan tabatin hopi suerte cune, ta cu coriente ningun momento a bay cerca nan. Esaki ta bon, considerando cu por lo menos 2.5 miyon persona (di e 21.5 miyon cu ta biba den Florida) a keda sin coriente. Den Orlando mes tin mas of menos 307 mil persona bibando.