- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
IPKO: Parlamentario di Corsou ta protesta pasobra no por papia Papiamento den Tweede Kamer
DEN HAAG – Parlamentario di Corsou Rennox Calmes (Trabou Pa Korsou) a crea un momento ‘interesante’ diaranson durante e reunion di IPKO (Inter Parlementaire Koninkrijks Overleg) na Den Haag Hulanda. Esaki ora cu e parlamentario a protesta cu e no por expresa su mes den su idioma Papiamento. Asina e portal Caribisch Netwerk ta raporta. Segun e raportahe, e parlamentario irita, a hiba su discurso pa varios minuut den Papiamento, dilanti di parlamentarionan Hulandes. E parlamentarionan di Aruba, Corsou, St Maarten y Hulanda ta hunto e siman aki, discutiendo netamente riba e.o. e control den democracia y e pasado colonial Hulandes.
DEFICIT DEMOCRATICO
Segun e parlamentario di Corsou, e ta cuestiona cu no tin traductor pa nan, mientras cu esnan di St Maarten, si por papia nan idioma cu ta ingles. “St Maarten y Hulanda por papia nan propio idioma aki” Calmes ta bisa segun e relato di John Samson den e portal CN. E presidente di IPKO Mariëlle Paul a bay di acuerdo cu e situacion, mientras cu lo tabatin varios parlamentario di e delegacion Hulandes cu tabata irita. “Pa boso esaki por ta fastioso, pero pa nos tambe ta fastioso pa pretende cu mi por papia boso idioma mes bon” Calmes a bisa su coleganan hulandes. Parlamentario Jorien Wuite (D66) a compronde e situacion y ta cuestiona e ‘deficit’ aki unda cu un parlamentario no por ‘expresa su mes’ bon.
SOSTEN DI ARUBA Y CORSOU
Segun presidente di parlamentario di Corsou Charetti America y parlamentario Shailiny Tromp di Aruba ta sostene e punto di Calmes. Segun America, a trata e tema aki caba den e presidium na mei (di idioma). Di otro banda America ta haya cu e por a atende e asunto di otro forma. “Mi ta sinti mi mes yama pa sostene e iniciativa aki” parlamentario di Aruba, Shailiny Tromp a bisa na e ocasion aki segun e relato di CN. “E hulandes no ta di nos. E ta forma pa algun un barera pa por presenta nan pensamento y argumento dilanti. Bo no kier esey durante debatenan cu ta asina importante pa nos paisnan” e parlamentario a sigui bisa.
PROBLEMA
E problema segun algun parlamentario ta e forma con tin cu atende esaki, pasobra si bay busca traductornan pa e reunion, esaki ta nifica mas gasto. E ora e pregunta ta cu si mester di un traductor pa ingles, hulandes y Papiamento?. E asunto a keda trata den pasado caba, for di tempo di defunto parlamentario di Corsou Helmin Wiels na 2012. E tema ta keda vigente y cayente aunke no tin un decision riba con pa resolve e asunto di idioma aki.
Articulo cortesia di Caribisch Netwerk y autor John Samson. Potret cortesia di Vigilante Corsou.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
