CBS ta buscando encuestador part-time pa e Encuesta di Mucha y Hoben 2022!

ORANJESTAD - Cuminsando diabierna 14 di oktober, Oficina Central di Estadistica (CBS) ta organiza un encuesta tocante mucha y hoben “Child & Youth Survey 2022”. E proposito di e encuesta aki ta pa haya un mihor bista di diferente tema di importancia pa mucha y hoben. 

E encuesta ta toca temanan manera por ehempel actividadnan di mucha y hoben den nan tempo liber (deporte, arte, trabou boluntario), participacion na scol, participacion riba mercado laboral, bista riba nan futuro, relacion cu mayornan, uso di celular, medionan social y gaming y posibel problema relata na esakinan, humamento/vaping, uso di alcohol y droga y salud mental. E temanan aki ta sumamente importante pa CBS por suministra informacion relevante, valioso y di calidad halto. 

Pa e encuesta aki ta uno exitoso, CBS ta buscando personanan cu lo desea di fungi como encuestador part-time. Mirando cu e encuesta ta dirigi riba mucha y hoben, e entrevistanan mester wordo haci primordialmente durante oranan di atardi y anochi esta entre 4’or di atardi y 8’or di anochi.

Pa fungi como un encuestador, mester:

-           por traha cu un Tablet

-           por lesa, scirbi y papia Papiamento, Ingles, Hulandes y Spaño

-           tin por lo menos 25 aña di edad

-           tin experiencia con pa traha y trata cu mucha y hoben

-           tin por lo menos un diploma di MAVO

-           ta un residente di Aruba (persoonsnummer)

-           tin un rijbewijs valido y un medio di transporte propio

-           ta compromete su mes pa asisti na 1 training obligatorio

-           ta disponible part-time durante e periodo di 14 di oktober te cu 25 di november

-           ta disponibel pa traha den siman atardi/anochi y den weekend.

Tur persona cu ta cumpli cu e rekisitonan menciona por solicita pa ta un encuestador, tanten cu nan ta disponibel durante e periodo menciona.

Pa solicita of pa mas informacion por jama libremente na telefoon: 524-7417 of por manda un e-mail na ykelly@cbs.aw. Lo haya un formulario digital pa yena via e-mail.