Minister a inaugural e Cruise Tourism Symposium riba dia di Turismo

ORANJESTAD – Diamars dia 27 di September a celebra World Tourism Day y na mesun momento tambe a celebra Cruise Tourism Industry, cual ta un parti importante den e industria di turismo. Minister di Turismo y Salud Publico, Sr. Dangui Oduber, a inaugura e “Cruise Tourism Symposium” diamars atardi na Marriott Ballroom. 

Durante e symposium aki tabata tin diferente presentacion cu a tuma lugar cu un grupo diverso di expertonan di Aruba pero tambe internacional. Tin diferente invitado a bin for di Europa pa asisti e “Aruba meets Europe conference” y na mesun momento tabata presente pa e symposium di crucero. 

E strategia pa cu e industria aki ta pa pais Aruba haña mas entrada por medio di e turista crucero cu ta inverti ora cu nan baha na Aruba. Den e vision di turismo crucero tambe tin e 4 puntonan cardinal cu lo enfoka riba dje den e siguiente añanan. Esakinan ta turismo sostenibel, desaroyo di isla Aruba, innovacion y un isla cu ta rico den data pa por evalua y sigui hasi plan y proyecto nan pa eleva e calidad di producto Aruba y locual nos ta ofrece.

Tambe mester menciona cu den 2023 tin diferente liña di curucero cu lo cuminsa yega na e port di Aruba, entre otro Silversea y Seabourn, Virgin Cruises, Ritz Carlton Yacht Collection y tambe Explora Journeys. Tur esakinan ta parti di e plan strategico pa diversifcia turismo crucero y crea mas entrada pa pais Aruba.