Gobierno ta sigura cu no a scohe ‘gevmin’ pa Washington ainda, pero realidad ta otro!

ORANJESTAD – Gobierno di Aruba a sigura diamars den un comunicado, cu ‘no tin decision ainda ken lo reemplasa e actual minister plenipotenciario na Washington, Joselin Croes’. Esaki ta interesante mirando cu varios medio (incluyendo NoticiaCla) a raporta caba cu e posicion a keda yena caba y cu e nomber te hasta ta conoci. No solamente esey, pero e persona en cuestion, actual abogado Ronny Wix mes a confirma su funcion diamars pa NoticiaCla. E pregunta ta unda e confusion ta of ‘ken no a haya e memo’.

PERIODO TA FINALISANDO 

Den e comunicado diamars, gobierno a splica cu e periodo di e actual minister plenipotenciario na Washington, Joselin Croes ta finalisando y basa riba palabracion den coalicion, partido Raiz mester propone un candidato nobo. Sra. Joselin Croes tambe tabata candidato di e partner den coalicion anterior, POR. 

PROCEDURA A CUMINSA CABA

E comunicado ta sigui bisa cu ‘e procedura pa reemplasa e minister plenipotenciario a cuminsa caba’. Como ta un procedura cu ta tarda, y cu mester wordo aproba pa Hulanda, e nombracion di Joselin Croes a wordo prolonga te cu maart 2023. “Ora e procedura finalisa, Gobierno di Aruba lo anuncia ken lo bira e siguiente minister plenipotenciario na Washington”. Esaki siendo cu e posicion a keda yena caba te cu e persona tin fecha di cuminsa caba.