IPKO: Aruba, Corsou y St Maarten a opta pa no presenta nan version di geschillenregeling

DEN HAAG – Ultimo momento, asina e portal Dossier koninkrijksrelaties ta raporta, e delegacionan di Aruba, Corsou y St Maarten a opta pa no presenta nan version alternativa di e asina yama ‘geschillenregeling’. Aparentemente nan no tabata riba e mesun liña ainda. E presidente di IPKO a anuncia na final di e prome dia, cu e tema a keda ‘elimina’ di e punto di agenda di diaranson y cu a dicidi cu lo trata e tema awor den e proximo reunion di IPKO. Cu esaki, ta mustra cu un biaha mas e tema aki ta keda algo dificil pa traga pa Hulanda y tambe e islanan en cuestion. Hulanda tin problema pa concede cierto ‘poder’ pa miedo cu e por perde esaki pa semper. E islanan en cuestion kier sigura cu nan interesnan ta cuida y ancra den un ley cu ta duna e areglo e poder necesario manera cu ta e intencion. Desde 2010 e tema aki ta bula rond, sin cu e paisnan en cuestion por haya otro.