Aruba ta encurasha turistanan Mericano pasa vacantie aki cu nan cacho

ORANJESTAD – Den cuadro di e National Dog Week (Siman Nacional di Cacho), oficina di turismo di Aruba ta encurasha turistanan biaha cu nan cacho pa Aruba durante un tempo limita. Entrante 19 di September ATA a lansa e campaña promocional ‘Have Dog, Will Travel” (Tin Cacho, lo biaha!). E ta pa incentiva bishitantenan pa trece nan cachonan pa Aruba cu nan vacacion, pa asina experencia e ‘efecto di Aruba’ ey pa nan mes. Di otro banda ta brinda e turista cu biaha tambe un experiencia diferente pa nan cachonan, si esakinan keda cas mientras cu e doño(nan) biaha pa Aruba. 

E PLAN

Segun e plan, ATA a join cu e companianan Wag! y Avvinue unda cu ta enfoca riba hotelnan na Aruba cu ta acepta cacho. Entrante awe te dia 20 di October 2022, turistanan di Merca por biaha cu nan cacho, pa asina experencia un vacacion cu nan mascota. “Aruba ta un destinacion cu no ta solamente permiti bo rtrece bo cacho, pero ta yama nan bon bini cu brasa habri” Ronella Croes, CEO di ATA ta bisa. “Cu e promocion aki, nos ta purba yuda doñonan di mascota pa disfruta di un vacacion perfecto riba e One Happy Island, sea ta cu nan ta planea pa trece nan ‘compañero, of laga nan sigur na cas mientras cu nan (e turista:red) ta biahando”. NoticiaCla a compronde cu tin por lo menos 6 hotel na Aruba cu ta permiti turista keda cu nan cacho na e propiedad. Segun e lista presenta, e hotelnan ta Amsterdam Manor, Bucuti y Tara Bech, Courtyard by Marriott, Hyatt Place Aruba Airport, Hyatt Regency Aruba Resort, y The Ritz-Carlton. 

REKISITO

Mester bisa mesora si cu mientras cu ta encurasha turistanan Mericano pa biaha cu nan cacho pa Aruba, e portal di ATA ta mustra mesora si e lista di rekisito cu ta necesario pa e turista por biaha cu e mascota. Esaki ta encera entre otro cu e cacho mester tabata na Merca pa por lo menos 6 luna prome cu e biaha pa Aruba, ta vacuna y tin tur shot contra ‘rabies’, y e cacho mester ta micro chipped y finalmente, mester download y yena un formulario special.