- Bucuti & Tara Beach Resort a Celebra Housekeeping Week cu Premionan y Reconocementonan Special
- KNVB: Wega suspendi entre Ajax y Feyenoord na Hulanda, ta sigui diaranson awor
- Gobierno a inicia siman di accion pa cu metanan di desaroyo sostenible (SDG's)
- KLM a yega na acuerdo cu pilotonan, evitando un welga awe
- SKOA a celebra nan acreditacion oficial di e programa Erasmus+
Prome Minister Wever-Croes ta atende apertura di asamblea general di UN na New York
ORANJESTAD - E siman aki, Prome Minister Evelyn Wever-Croes conhuntamente cu demas Minister den Reino a biaha pa New York pa atende e apertura di e Asamblea General di Nacionnan Uni. Den transcurso di siman lo tin varios reunion programa, especialmente cu Secretario General sr Antonio Guterres na unda tin e oportunidad pa cada isla trece nan puntonan di preocupacion padilanti.
Pa Aruba e reunionnan aki ta sumamente importante ya cu e isla ta den e etapa di recuperacion despues di covid. Nacionnan Uni ta boga pa duna un tipo di “kwijtschelding” of subsidio na paisnan cu mester a cera debenan halto durante pandemia y e punto aki tambe lo wordo treci na mesa durante e reunion.
ENCUENTRO TOPICO EDUCACION
Prome Minister tambe a wordo invita pa atende den nomber di Reino e cumbre riba educacion. Esaki ta un encuentro di Nacionnan Uni cu diferente paisnan pa analisa e retonan nobo cu tin riba tereno di educacion en general den desaroyo di e paisnan despues di Covid. Prome Minister lo hiba palabra durante e cumbre aki y lo trece dilanti con Aruba ta atendiendo cu e retonan aki.
IGUALDAD DI GENERO
Prome Minister lo reuni tambe cu UN Women cu ta un agencia di Nacionnan Uni cu ta yudando Aruba cu e “gender policy”, cu ta e maneho riba derecho di hende muhe na Aruba.
Pa cu e tema aki, lo tin algun conferencia organisa na unda Prome Minister lo hiba palabra y lo mira si por haya fondo pa yuda Aruba atende cu e tema aki na un forma mas eficiente.
Tur hende a wordo afecta durante e pandemia di Covid19 pero e muchanan, e grandinan y e hende muhenan ta esnan cu mas a wordo afecta. Pa e motibo aki ta considera importante pa para keto na e rol di hende muhe den sociedad evitando asina di core e riesgo cu nan lo keda aun mas atras den desaroyo, perdiendo asina e lucha y sacrificio di e hende muhenan di generacionnan anterior.
RELACIONNAN EXTERIOR
Otro reunion cu Prome Minister lo atende ta esun cu “State Department”, cu ta e departamento cu ta atende cu relacionnan exterior. Durante e reunion aki lo toca e tema di Venezuela, e rafinaderia y otro temanan importante.
Por ultimo, Prome Minister tambe a wordo invita pa Clinton Foundation cu ta un fundacion di e ex presidente di merca Bill Clinton, di Hillary y Chelsea Clinton, cu a hiba palabra den un encuentro ora ta trata di resiliencia.
Esaki ta algun di e reunionnan y encuentronan pa e siman aki na New York. Mas den transcurso di siman Prome Minister lo duna un relato extenso riba cada un reunion y e logronan di e reunionnan aki pa pais Aruba.
Gobierno a inicia siman di accion pa cu metanan di desaroyo sostenible (SDG's)
ORANJESTAD – Dialuna mainta gobierno di Aruba a inicia siman di accion pa cu e metanan di desaroyo sostenible (SDG's). Manera ta conoci, Gobierno di Aruba den su esfuerso pa un miho desaroyo pa cu inclusion y derechonan humano, ta hiba un maneho cu ta cuadra segun e "Sustainable Development Goals" (SDG's).
Minister a habri Expo Promove Salud y Bienestar 2023 diasabra
ORANJESTAD – Diasabra mainta minister di Turismo y Salud Publico sr. Dangui Oduber, conhuntamente cu coleganan Minister Tjon & Parlamentario Tevreden, a haci apertura di e Expo Salud, e biaha aki cu tema “Promocion di salud y actividad fisico na trabou” cu a tuma luga na Renaissance Convention Center.
Global Travel Conference ta pa crea un futuro prospero pa Aruba como destinacion
ORANJESTAD – E siman aki Minister di Turismo sr. Dangui Oduber a atende e Global Travel Conference organisa pa Aruba Tourism Authority. Dialuna e mandatario a hiba algun palabra yamando Bon Bini na tur e invitadonan y socionan di mercado Norte Americano, Canades, Latino Americano y Europeo.
Mas cu setenta Baki di Desperdicio colecta durante Baki den Bario na Santa Cruz
ORANJESTAD - Diasabra ultimo a tuma luga e di dos edicion di Baki den Bario na Santa Cruz. Baki den Bario, cu ta forma parti di campaña nacional ‘Limpi Limpi’, ta un evento unda ta pone baki di desperdicio na diferente districtonan rond di Aruba.
Tjon: Persona deteni na Merca no ta doño di compania cu ta lease helicopter cu KPA
ORANJESTAD – Tur cos ta ok cu e deal cu Aruba tin cu e compania Colombiano SADI pa loke ta e helicopter di polis. Por lo menos asina minister di husticia Rocco Tjon a sigura prensa dialuna mainta. E mandatario a bisa tambe mesora cu e la manda Parlamento un carta solicitando un reunion pa por presenta tur documentacion na Parlamento y aclaria e situacion actual cu a surgi den e fin di siman aki. E mandatario a referi na e declaracion cu Noticiacla tambe a publica diadomingo, unda cu lo a resulta cu e doño di e compania lo a entrega su mes na DEA na Merca pa traficacion di droga. E informacion ey a crea consternacion y cu a pensa cu esaki por tin implicacion serio pa Aruba, gobierno y polis.
Wever-Croes:Cierto expresionan di van Huffelen pa cu Aruba ta robez
ORANJESTAD – Segun premier Evelyn Wever, cierto expresionan di secretario di estado Hulandes Alexandra van Huffelen siman pasa den Tweede Kamer ta robez. Ademas segun e premier, hopi hende, incluyendo periodista ta mira mucho television, y den e caso aki television hulandes, y mas specifico ainda, e parti politico. E mandatario a implica durante su conferencia di prensa dialuna mainta cu tin hopi hende cu ta prefera kere loke e ta mira y scucha na television Hulandes envez di loke ta pasa den Politiek Aruba. “Boso mester bin sinta kinan den Parlamento, anto wak e debatenan di BO Parlamento di Aruba” sugeriendo cu esnan cu tin keho, ta wak mucho, of solamente esun di Hulanda y no di Aruba. “Mare esnan manera abo ta papiando (e tabata referi na periodista di e portal 24ora.com) ta poniendo tanto atencion na desaroyo di Aruba mane boso ta pone na desaroyo na Hulanda”, e mandatario a bisa. E mandatario a sigura cu tur informacion pertinente na caso di RAFt a keda presenta na Aruba den Parlamento, unda cu varios pregunta cu prensa a haci dialuna (awe) y ta haciendo (incluyendo di Noticiacla recientemente), a wordo contesta den Parlamento, y a keda transmiti en bibo pa tur hende mira. “Pero diripiente pasobra na Hulanda tabatin algun ora di transmission, pa tur hende esey a bira lo sagrado”. E mandatario a bisa di ta lamenta e actitud ey. Segun e mandatario, nos tin cu kere den nos hendenan.
Follow NoticiaCla
