Corte: Susebeek lo a yuda Sevinger cu su cas, a cambio di fabor di tereno

ORANJESTAD – Un di e sospechosonan cu a presenta dilanti mesa berde awe diaranson pa e caso penal Avestruz tabata comerciante P. Susebeek (64). E tambe, mescos cu e otro comerciante C.Harms cu a presenta, tabata sospecha di soborno activo di e actual parlamentario y antes minister Benny Sevinger, cu ta e sospechoso principal den e caso. Susebeek lo a paga placa na Sevinger, a cambio di fabor pa tratamento preferencial y tereno erfpacht. Contrario na Harms, Susebeek a nenga di contesta preguntanan di hues, indicando cu e la contesta tur cos caba durante su interogacion. Hues e ora a opta pa cuestiona Sevinger riba e relacion aki y wak con leu nan ta yega. Susebeek a sinta un luna den detencion preventivo. 

E INTEROGACION

Pa cuminsa, a establece e relacion entre Sevinger y Susebeek, y unda cu hopi liher, a bin sali na cla cu nan ta hopi bon amigo di otro, y unda cu Sevinger a hasta declara cu e ta considere su ruman. “Nos ta core hopi bicicleta hunto” Sevinger a bisa, cu Susebeek a confirma tambe despues indicando cu nan ta topa otro hopi. E prome sospecho tabata ora cu hues a cuestiona Susebeek su envolvimento cu e trahamento y remodelacion di e caso di Sevinger. Segun Sevinger, e tabata pidi Susebeek pa conseho (Susebeek tabata trahado di DOW y ter beschikking di Sevinger tempo cu e tabata minister:Red), y tambe ora di busca material y presupuesto, e tabata duna Susebeek placa pa e ‘take care di esey’. Hues a puntra Sevinger, pakico no paga y haci esaki e mes, enves di laga Susebeek haci esaki, Sevinger a contesta cu e tabata minister 24/7 pues hopi ocupa y no tabatin tempo. Hues a puntra e ora si tabatin prueba di pagonan haci na Susebeek pa e trabounan ey, riba cual Sevinger a responde cu e tabata haya e recibonan di Susebeek pa loke cu a wordo cumpra. Pero no tabatin recibo (kwitantie) cu Sevinger tabata duna Susebeek e placa. 

PREFERENCIA

Tanto hues como OM a puntra Sevinger si e relacion aki a pone cu Susebeek tabata haya trato preferencial pa cu fabornan y tereno, Sevinger a sigura cu no. “Esey no ta cuadra! Tur hende tabata haya e mesun trato!” Sevinger a sigura un biaha mas. Y esey tabata conta tambe pa su bon amigo Susebeek.  Hues a puntra Sevinger si Susebeek a haya opcion pa tereno erfpacht, riba cual Sevinger a confirma, pero no cu ta tereno preferencial manera cu e ta wordo tilda di dje. Berdad cu e la haya tres tereno, pero e localidad nan no ta mucho bon y mayoria di e terenonan no tin nada poni ariba. E acusacion tabata cu door di e relacion y e pagonan haci, Sevinger lo a duna Susebeek terenonan special ubica riba lugarnan lucrative. Sevinger a contra aresta esaki. :”Coi kens!” Sevinger a sigura e hues y e fiscal. 

TERENO APROBA CU URGENCIA

Hues tambe a cuestiona un documento cu Sevinger lo a firma cu tabata para ‘SPOED’, osea URGENCIA, pa Susebeek. Sevinger a splica aki cu ta trata di su consehero Every, (cu tambe ta un sospechoso den e caso aki:red) cu a pone SPOED riba e carta y manda pa Sevinger firma. Pues no ta Sevinger a pone SPOED. Di otro banda, segun Sevinger, e por compronde e necesidad si pasobra tabata trata di un tereno cu tabatin masha tempo ta den proceso.