Caso Diamante no tin fecha oficial pa keda trata ainda segun huez

ORANJESTAD – E tratamento conoci como caso Diamante, cu ta trata desfalco y falsificacion di documento di fundacion di e partido politico POR, no tin fecha oficial pa wordo trata. Diahuebs mainta huez a trata e caso aki ‘pro forma’, pa determina kico mas falta pa e caso por tuma lugar oficialmente. E caso ta uno di perfil halto mirando cu ta trata di un ex polis politico Allam Howell y miembro di partido Jacky van Putten cu ta wordo acusa pa e cargonan menciona. E caso oficialmente mester a cuminsa diahuebs, pero tabatin cambio di abogado door di Howell cu tabatin mes tempo pa studia e documentonan. Ademas e abogado nobo, Doris Canwood a pidi pa scucha mas testigo. Entre nan, es miembro di e partido, actual parlamentario Marisol Lopez Tromp. Pa loke ta e cargonan, ta data di un periodo entre September 2017 y maart 2021 durante cual e actonan supuestamente a tuma lugar. 

MARISOL LOPEZ TROMP

E discusion diahuebs tambe tabata rond di e scuchamento di e testigo Lopez Tromp cu supuestamente lo tabata actua mescos cu e dos sospechosonan actual a actua, pues usando e mesun modus operandi. Y cu e testimonio aki, kier proba cu e dos personanan en cuestion no a haci nada malo. Tabatin discusion riba e ken tin cu haci e interogacion, y si ta landsrecherche of huez comisario. Na final di henter un discusion, huez a dicidi cu ta permiti pa interoga Lopez Tromp entre e lista y cu e ta sosode pa huez comisario.