Gobierno a entrega presupuesto na tempo pero sin un surplus

ORANJESTAD – Gobierno di Aruba porfin a logra entrega presupuesto di pais Aruba pa e siguiente aña (2023) conforme ley di comptabilidad, esta pa 1 di september di e aña anterior, pero a haci esaki cu un deficit mientras cu e colegio di supervision financiero a exigi pa e presupuesto ey tin un surplus di 1%. Di un banda, gobierno pues ta cumpli cu e ley, pero di otro banda, e no ta cumpliendo cu recomendacion di CAFt pa tin un surplus. No ta conoci ainda kico esaki lo nifica pa Aruba. 

E PRESUPUESTO 2023

E mandatario a splica diahuebs cu a logra pa entrega esaki na tempo, aunke cu un deficit di 25 miyon. Di otro banda, e mandatario ta mustra cu e ta un logro sigur si tene na cuenta cu a logra baha e deficit di mil miyon florin te na 25. E presupuesto aki lo tin 1.532 miyon na entrada y 1.557 na gasto. Ta haciendo tur posibel ainda pa wak si por logra baha esaki mas ainda, pero no sa si ta logra. Mes momento e mandatario ta usa e pensamento di Fondo Monetario Internacional (IMF) cu ta ‘ok’ cu un surplus te na 2027 den cual ta duna e economia e tempo pa recupera mas envez di manca esaki. Segun e mandatario, ta Hulanda ta esun cu via CAFt ta poniendo presion pa tin un surplus, pase loke pase. 

CAFt

Den su ultimo carta di dia 14 di juli (2022), ta bisa cu Aruba mester haci su maximo intento pa reduci e deficit y ‘for di 2023, realisa un surpus’. Specificamente CAFT ta bisa textualmente cu ‘Aruba por y mester desde 2023 realisa surplus riba e presupuesto’. Ademas CAFt ta mustra compression pa e situacion cu a surgi di pandemia y cu e ta un ehercicio dificil, tambe pa Aruba. “Pero ta claro cu Aruba casi no ta usa e posibilidad pa tuma medidanan structural” e colegio ta sigu bisa. “Awor cu tin un recuperacion economico, Aruba mester di berdad tuma e rumbo real pa un finanza publico duradero”.