Falta di fondo a pone fundacion reduci cantidad di desayuno pa muchanan den necesidad

ORANJESTAD – E siman aki e fundacion, conoci pa suministra desayuno na un grupo grandi di alumno na Aruba, esta Fundacion Ban Uni Man pa Cria nos Muchanan a anuncia cu nan tin problema cu fondo pa cual mester reduci nan operacion drasticamente. E consecuencia ta cu hopi menos mucha lo ricibi desayuno awor. E mensahe tabata uno simple pero duro:”Ta duel nos masha di mester informa boso cu nos ta hanja nos obliga di tuma algun medida” e mensahe a cuminsa bisa, splicando ademas cu debi na nan situacion financiero, cu no ta permiti pa nan por duna servicio na e cantidad grandi di mucha kendenan ta inscribi den nan programa di desayuno y cual a surpasa 800 mucha. Traduccion ta cu 300 mucha menos lo por ricibi desayuno awor. 

ESCASES

Segun e fundacion, tur luna nan tin un escases di casi  Fls 16000.00, cual ta igual na desayuno pa 300 mucha. “Pues nos lo mester baha for di e 800 te na alrededor di 500 mucha” e mensahe ta sigui bisa. 

MEDIDA

Consecuentemente nan a anuncia un medida cu lo tin cu implementa proximamente.  

1. Entrante e aña escolar nobo nan lo no por aporta mas na e Proyecto di Trai Merdia, pues e skolnan ey ta cai afo. E grupo aki ta representa 80 mucha.

2. Nan a pidi tur otro scol pa screen e muchanan pa asina e muchanan cu ta echt, echt den necesidad so lo sigui haya nan desayuno.  Fuera di Trai merdia ainda nan falta pa corta al rededor di 220 mucha pa nan por opera sin perdida, pues un corte di mas o menos 30%.

“ Nos ta lamenta esaki profundamente pasobra pa hopi di e muchanan aki e desayuno aki ta e cuminda principal cu nan ta haya pa dia” e fundacion ta sigui bisa.  “ Si bo tin sugerencia con nos por elimina e deficit aki, of si bo conoce negociante y/of organizacion cu lo por yuda e muchanan aki, por favor laga nan tuma contact cu nos of si bo mes persona kier sponsor un of mas mucha, tambe ta posibel door di habri un standard order na bo banco preferi” e mensahe ta sigui bisa. Aunque e ta costa noan Fls 50.00/luna pa yuda un mucha cu su desayuno, no ta importa cuanto bo kier duna: tur donashon lo yuda.