Ex premier di Corsou ta sigura di a yega na areglo di pago cu OM pa evita prizon atrobe

WILLEMSTAD – Ex premier di Corsou Gerrit Schotte parce di lo evita di bay prizon atrobe. Riba su pagina personal di Facebook diabierna, a confirma cu e la keda cla cu Ministerio Publico pa loke ta e areglo di pago cu e tin cu haci di mas di un miyon florin. Cu e areglo di pago aki, e ta evita di tin cu bay cera atrobe. “Mi ta gradisido na Dios di por anunsia bo ku na kuminsamentu di e siman aki finalmente a yega na un akuerdo di pago ku Ministerio Publiko i a firma e akuerdo di pago. Esaki ta enserá ku a yega na akuerdonan ku Ministerio Publiko riba e forma ku mi ta bai kumpli i ya kaba ta kumpliendo ku e obligashon di pago” e ex mandatario a bisa. E no por a duna mas comentario, conforme e areglo firma. “ Ku esaki e kaso por wòrdu konsiderá terminá. Mi agradesimentu ta bai na un i tur ku a apoya mi den orashon, o di un otro manera den e proseso aki, Danki” e ex mandatario a finalisa bisando. 

VAN DER DIJS

E siman a habri cu su ex pareha Cicely vd Dijs drentando prizon e biaha aki como parti di e sentencia di 2018, pero cu a wordo wanta atras conforme palabracion haci. Vd Dijs a keda sentencia como complice di labamento di placa den caso Babel, cu ta involucra e y su awor ex pareha Schotte. Durante cu Schotte tabata cera prome biaha, e pareha a separa di otro. E siman aki tabatin un discusion cu Schotte lo kier a haya custodia completo di e yiunan, awor cu e mama ta cera. Tabata pensa cu esaki lo tabata un forma di evita cu e mester a bay cera atrobe. Un reaccion di abogado di vd Dijs no tabata exitoso awe.