Landador Deaxo Croes ta cruza laman entre Bonaire y Corsou na November awor

ORANJESTAD – E conocido landador Deaxo Croes ta cruza laman entre Bonaire y Corsou na November awor. Na 2018 e tabata parti di e grupo di landador cu a landa di Venezuela pa Aruba caba. E biaha aki e ta haci algo riba su mes. Segun splicacion di Deaxo durante un conferencia di prensa, e la splica cu indjan tabata e promenan pa hacie, despues a bin e colonisadonan y, te dia di awe, piscado tambe; cada un cu un motivacion distinto pa crusa lama entre e islanan. Awo un di nos ta scoge pa bolbe hacie pa yuda su prohimo. Lama, ademas di su bondad comestibel, tambe tin un parti integral den desaroya nos curiosidad y fortaleza. Awo e ta bay yuda nos tur pa desaroya nos sentido humano.

Dia 19 di november proximo, Deaxo  ta bay pa e hazaña di ta e prome persona pa landa e trayecto di 53 kilometer entre e punto conoci como Red Slave na Boneiro te na Oost Punt na Corsou. E desafio aki ta uno cu Croes a bin ta traha riba dje for di aña 2020 pa medio di tres entrenamento cu a permitie identifica e factornan cu e por enfrenta durante e crusada. Por bisa cu tur entrenamento tabata exitoso y basa riba esey a dicidi pa realisa e hazaña den 2022.

‘Crossing for Prevention’ of ‘Crusando pa Prevencion’ ta e nomber cu a scoge pa duna e hazaña haciendo referencia na Crossing for Hope cu tabatin dia 11 di november 2018 ora cu a Deaxo Croes a landa entre Venezuela y Aruba hunto cu otro cuater landado y a recauda 123 mil florin pa Wilhelmina Kankerfonds.

E biaha aki ta bay mas leu y ta amplia e esfuersonan pa inclui prevencion di cancer y beneficia tres fundacion; un riba cada isla ruman di e constelacion ABC. Di e manera aki, e fondonan recauda lo ta reparti entre Kankerfonds Bonaire, Caribbean Prevention Center na Corsou y Fundacion Coresa di Aruba. Tur donacion ricibi ta bay directamente na e cuenta bancario di cada fundacion.

Informacion relaciona cu e evento aki ta obtenibel riba e website oficial, esta www.crossingforprevention.com, mescos cu riba plataforma social di Facebook y Instagram. Aki por sigui tambe tur desaroyo y avance den e entrenamento, preparacion y trabou di cada fundacion. Tin compania cu ta colaborando caba pa cubri e parti di logistica mara na un hazaña asina, sinembargo ta invita otro organisacion comercial pa uni nan mes na e causa.