Wever-Croes: Decision si RMR ta duna Aruba aanwijzing of no, por cay na October

ORANJESTAD – Lo mas probable ta cu Rijks Ministerraad (RMR) lo dicidi fin di October si Aruba ta haya un aanwijzing (instruccion) segun prome minister Evelyn Wever a bisa diahuebs. Tabata den un declaracion na e portal 24ora durante un actividad na e cede di e partido geel na Sta Cruz, cu e prome mandatario a splica e situacion. Berdad cu e aanwijzing ta poni riba agenda pa wordo trata diabierna, esta mayan, pero no cu e decision mes lo cay mayan. Pa un decision cay, RMR mester di e reaccion di Aruba prome. 

REACCION

Segun e mandatario, despues cu a tuma nota di e conseho di e colegio di supervision financiero pa Aruba CAFt na RMR pa Aruba haya un aanwijzing, Gobierno di Aruba a manda un prome reaccion caba cu tambe ta riba agenda pa wordo trata diabierna, esta mayan. “Rijks Ministerraad ta bay duna nos e tempo pa bin cu un reaccion oficial, cu segun ley ta yama un ‘zienswijze’” e mandatario a sigui bisa. Esaki ta stipula den e ley di LAFt pa cual e aanwijzing lo por wordo duna, cu pa bo haya un aanwijzing, bo tin cu duna bo reaccion oficial y despues esey lo wordo trata, muy probablemente na October, fin di October, cu un decision final ta bay cay” e mandatario a sigui bisa. Pero, ta keda na RMR pa dicidi riba tur esaki. Loke por varia, ta cu e tempo riba cual lo dicidi pa Aruba, ta mas cortico of mas largo, of manera cu e mandatario di Aruba a bisa, fin di October.