Partidonan di oposicion a entrega carta na VNO pa premier Rutte prome cu RMR di diabierna

ORANJESTAD – Lider di partido AVP Mike Eman, acompaña pa lider di partido ACCION21 Miguel Mansur, ambos partidonan den oposicion a entrega un carta dirigi na Gabinete Rutte III, y a haci e entrega na e director di VNO pa Aruba David Abrahams diaranson atardi. Durante e entrega, Eman a pidi Abrahams pa e carta yega den man di premier Rutte prome cu diabierna y consecuentemente prome cu e reunion di Conseho di Minister di Reino di diabierna awor, unda cu tin e tema di aanwijzing riba agenda. Abrahams a bisa cu e no por garantisa esey, pero loke e lo haci sin mas, ta dirigi e carta pa su coleganan di ministerio di Relacionan di Reino Hulandes. Por a compronde cu e partidonan di oposicion ta sostene e recomendacion di e colegio di supervision CAFt pa RMR duna Gobierno di Aruba un aanwijzing. Tambe e lider di partido AVP a sigura cu e partido MAS y su lider Marisol Lopez Tromp a firma e carta (NoticiaCla independientemente no por a verifica esaki ya cu e no tabatin e carta den su poder) cu a keda entrega. Pa loke ta partido ACCION21, Mansur a sigura cu e ta sostene e punto di AVP y kier pa e ‘sinberguenseria’ di e Gabinete actual termina. Potret ta cortesia dii 24ora.com