Comerciante y ex pareha di ex premier Gerrit Schotte a entrega su mes na prizon

WILLEMSTAD – Awe mainta e conocido comerciante y ex pareha di ex prome minister Gerrit Schotte, esta Cicely van der Dijs a entrega su mes na porta di prizon SDKK pa cumpli cu un sentencia di prizon di 7 luna, pa e caso di algun aña pasa Babel, unda cu e y su ex a keda sentencia relaciona cu actonan ilicito segun corte manera falsificacion di recibo via su negoshi, y compra di aparatonan pa blokea señal electronico. Schotte a sinta su castigo te sali, y ta pendiente un deal cu gobierno pa paga un suma miyonario, sino e tin cu bolbe sinta castigo. Mientrastanto van der Dijs a bringa su parti pero siman pasa e decision final a cay cu e tin cu sinta su castigo. Y esey a bira awe mainta. Noticiacla tabatin contacto cu ne den fin di siman y e la comenta pa e portal aki cu e acto aki e ta considera como inhusto. Awe mainta mientrastanto drentando porta di prizon, e la comenta tambe pa prensa pafo, un biaha mas expresando su desaprobacion pa e acto aki. Segun van der Dijs, e un mama inocente y tin cu bay interumpi su bida pa algo cu e no a haci, y awor kier cera un comerciante dunado di trabou cu ta percura pa pan di riba 200 hende. Despues e la dispidi di su familiarnan pafo y a drenta cu auto, cu su abogado Marije Vaders. Potret cortesia Telecuracao.