WEB: Un interupcion nobo a conduci na un di dos blackout dialuna

ORANJESTAD – “Nos ta experenciando tardanza den e proceso di recuperacion. A surgi interupcion di nobo, cual a conduci na un di dos black out. No por calcula ainda cuanto lo dura pa recupera e produccion” tabata e mensahe di WEB, dos ora despues cu Aruba a cuminsa reestablece su mes di un prome blackout algun ora prome.  E prome blackout causa pa WEB a dura mas of menos 2 ora y mei. E ora coriente a bin bek, pero banda di algo prome cu 9’or, e coriente a bay atrobe. “Entretanto algun area tambe ta experencia presion abou di awa of interupcion completo di awa. Esaki ta debi na e blackout, pero tambe na e hecho cu tanki di Alto Vista ta for di servicio pa motibo di mantencion. Nos ta pidi comprension y espacio pa nos tecniconan por haci e debido investigacionnan pa por soluciona y recupera produccion mas pronto posibel” e vocero di WEB, Asja Dongen a comunica despues. Algun rato despues, coriente a cuminsa bin bek atrobe, (pa di dos biaha) na varios caminda, mientras cu WEB tabata traha pa reestablece coriente bek 100% pa henter e isla.

REESTABLECE CORIENTE PROME BIAHA

Banda di 6’or y mei di mainta, WEB a duna un update indicando cu ainda no tabata sa e motibo di e fayo cu a causa e blackout inicial. “ Entretanto a logra lanta algun motor y ta calcula cu lo dura mas o menos 1 ora mas pa recuperacion total di produccion. Nos ta haciendo lo maximo pa recupera mas pronto posibel” Dongen a bisa den su di dos update awe mainta.

E BLACKOUT MES

E prome blackout tabata den careda di 4:48am awe marduga. Tabata den careda di 5:07am cu WEB a confirma cu e fayo tabata pa henter e isla, pues un blackout. “ A surgi un interupcion den produccion di coriente den planta di WEB cual a causa un blackout. No ta conoci ainda kico ta e causa y con largo lo dura pa recupera. Keda pendiente pa siguiente updates. Nos ta haci nos maximio esfuerso pa recupera e produccion mas pronto posibel. Nos disculpa pa e inconveniencia” tabata e prome mensahe emiti pa e vocero awe marduga ora cu e prome blackout a sosode. 

BLACKOUT PA 2022

Esaki ta e di tres blackout pa e aña aki, unda cu e ultimo tabata apenas 2 luna pasa riba 9 di juni 2022, y e prome tabata algun luna prome, da 15 di maart ultimo. Manera por a spera, e critica awe un biaha mas tabata severo, dirigi riba tanto WEB, Elmar y Gobierno, argumentando entre otro cu awor a aumenta tarifa di coriente, nos ainda a haya e calidad pober di blackout, mal maneho di e gerencia y tambe di gobierno y hopi mas.