Wever-Croes: No ta introduci BTW mas pero ta bay subi BBO

ORANJESTAD – Gobierno di Aruba diahuebs den un anuncio sorpresivo, a informa cu a dicidi cu no ta bay introduci BTW mas pa fin di aña, pero a scohe pa aumenta BBO di 1 pa 1.5% na januari 2022. E motibo cu a opta pa tuma e decision aki awor, ta pasobra segun prome minister Wever “Esaki no ta e momento oportuno pa bin cu’ne (BTW), especialmente mirando cu comercio mes a indica cu e no ta bay baha prijs pa saca BBO y despues bin cu BTW”. Basa riba declaracion di comercio cu a bisa cu ta wanta BBO y riba dje ta bin cu BTW, esaki ta causa un efecto inflatorio hopi mas halto. “Pesey nos a dicidi cu no ta prudente pa introduci e BTW aworakinan di 6 pa 14% sino pa aumenta e BBO di 1 pa 1.5% y bin cu cierto otro compensacionan” e mandatario a bisa.