Envez di augustus, lo trata e COHO 'nobo' cu van Huffelen na september

ORANJESTAD – Envez di trata e concepto ‘nobo’ di ley di COHO fin di augustus manera cu a palabra ultimo reunion entre e premiernan di e paisnan di Reino Hulandes y secretario di estado Hulandes van Huffelen, lo haci esaki awor na September. Asina e prome mandatario di Aruba Evelyn Wever Croes a bisa diaranson despues di a reuni cu van Huffelen y coleganan premier di Reino. A trata e tema, pero e concepto di e ley mes lo ta cla mas sigur fin di e luna aki. E ora por delibera ariba. E intencion tabata pa e mandatario Hulandes bolbe akibanda fin di augustus, pero esaki no ta sigui mas. 

REUNION PRELIMINAR 

 E prome mandatario a confirma den cuadro di esaki cu e siman aki a tuma luga un reunion virtual entre   van Huffelen hunto cu Premier di Corsou sr. Gilmar Pisas y Premier di Sint Maarten sra. Silveria Jacobs. Durante di e reunion a trata diferente tema, sinembargo esun mas importante tabata unda ta para na e momentonan aki cu e leynan di COHO. Ta tene e tipo di reunionnan aki regularmente pa trata temanan en comun. 

JUNI

E mandatario a recorda cu na luna di juni ora cu   van Huffelen tabata na Aruba y a reuni cu e Premier nan di Corsou y Sint Maarten, e paisnan a indica na Secretario di Estado cu nan no tin sosten di Parlamento pa e ley di Reino di COHO.  Na e ocasion a palabra, cu Aruba lo traha riba un alternativa pa e COHO. 

UPDATE 

Durante e reunion virtual cu a tuma luga e siman aki,  a delibera riba con ta bayendo y con leu ta, cu e alternativa. Ta aki ta unda cu premier Wever - Croes a indica cu ta calcula cu pa fin di e luna aki,  lo tin un concepto cu por delibera riba dje. Otro luna (september) lo tin un otro reunion entre  Secretario di Estado van Huffelen, Premier Pisas, Premier Jacobs  y Prome Minister Wever - Croes, pa trata e alternativa aki.

E” ta un hecho cu Aruba, Corsou y Sint Maarten a indica cu nan no tin sosten di Parlamento pa e Consencus Rijkswet di COHO, pues ta trahando riba un alternativa” Premier Wever - Croes a enfatisa.  

AANWIJZING

Pa Aruba, e tema di conseho pa aanwijzing ta un tema actual, pero esey no ta wordo trata den e tipo di reunionnan aki hunto cu e otro Premier nan.  Concluyendo, Prome Minister a bisa cu e siman aki lo papia di esaki si, cu Secretario di Estado van Huffelen  como cu e ta un tema cu ta concerni Aruba.  Asina ta trahando cu tur esfuerso pa evita e aanwijzing y pa asina Aruba por sigui den e rumbo di recuperacion.