Directiva di WVI ta cuestiona Utilities NV pa cu parke di molina di biento nobo

ORANJESTAD - Directiva di Asociacion di Empleadonan cu un Contrato Laboral Individual den Servicio di W.E.B. Aruba N.V. (“VWI”) despues di a lesa e invitacion pa cu e “EOI” di Utilities Aruba N.V. ta cuestiona fuertemente kico e intencion exacto di Utilities Aruba N.V. ta pa cu esaki. Ta trata di e parke di Molina di biento nobo cu NoticiaCla a raporta ariba como primicia recientemente. “Den e documento di e invitacion pa e EOI di Utilities Aruba N.V. ta wordo menciona, y nos ta cita: “U.A., which will most likely serve as the initial contracting party in connection with these projects....” ta laga sa cu ta Utilities Aruba N.V. su intencion pa ta e compania principal cu kier cera e contract aki pa cu un Power Purchase Agreement (PPA) pa cu e expansion di molinanan di biento pa produci energia. VWI, como asociacion di e gran mayoria di staff y profesionalnan trahando na W.E.B. Aruba N.V. (WEB), ta pone un ‘vraagteken’ masha grandi mes na e legitimidad di e intencion aki di Utilities Aruba N.V” e directiva ta bisa. Segun e directiva, “ta duidelijk for di e documento di e EOI di Utilities Aruba N.V. cu ta Utilities Aruba N.V. mes ta propone pa e bira e ‘dunado di trabou’ di e compania cu wordo selecta como proveedor di energia di biento”. Tambe, Utilities Aruba N.V. ta laga parce den e documento cu Utilities Aruba N.V. ta un compania masha grandi mes y manera un cos cu e empleadonan di WEB y N.V. ELMAR, como ‘subsidario’ di Utilities Aruba N.V., ta traha pa Utilities Aruba N.V.. Esaki no ta e caso segun VWI. Nan ta mustra cu Utilities Aruba N.V. ta consisti di un director, un persona cu ta fungi manera staff y un of ta dos personal administrativo. “Banda di e grupito chikito aki, Utilities Aruba N.V. a contrata un zogenaamd “experto” Venezolano, kende ta profila su mes manera ‘Don Sabelotodo’”e. “Profesionalnan di WEB (y miembro di VWI) kende a experiencia e zogenaamd “experto” aki den un esfera profesional ta duna di conoce cu e meneer sabelotodo aki ta hopi scuma y masha poco chuculati ora ta trata di topiconan manera sistemanan di produccion di coriente y sistemanan di produccion renovable. Anto ta e “genio” aki ta conseha e director di Utilities Aruba N.V.?” e directiva ta sigui cuestiona. 

VWI lo investiga e legitimidad di e “EOI” aki lansa pa Utilities Aruba N.V. y, dependiendo di loke bin sali afo di e investigacion, lo tuma e pasonan necesario pa mantene y enforsa e Good Corporate Governance cual, den VWI su opinion, ta wordo viola flagrantemente cu e “EOI” aki di Utilities Aruba N.V.. “Si Gobierno di Aruba, como accionista unico di Utilities Aruba N.V., no ta, of no por, mantene su mes na reglanan di bon gobernacion corporativo, anto e ora ta keda na gremionan manera VWI pa sali bin dilanti y mustra Gobierno di Aruba y Utilities Aruba N.V. cu nan ta actuando, den nos opinion, contra ley y na un manera cu ta lanta hopi preguntanan critico riba e legitimidad y integridad di e proceso di EOI entama pa Utilities Aruba N.V.” e directiva a finalisa bisando.