Prome Minister riba Facebook ta manda sindicalista compara ‘appel’ cu ‘appel’

ORANJESTAD – Un biaha mas un mandatario di e gabinete actual di Aruba a opta pa usa e red social popular Facebook pa contesta un ‘contrincante’ cu lo a haci un of otro expression den su direccion. Esaki a bira un practica practicamente comun di e gabinete aki, y dialuna esaki no tabata un excepcion. Den pasado tambe, e gabinete a usa e medio aki pa sea contesta of critica e medio aki (noticiacla) ora cu no tabata di acuerdo cu un of otro ‘post’. 

ULTIMO POST

Den e caso mas recien, tabata prome minister awe dialuna cu a bay pa e sindicalista di enseñansa Josephine Albertus:” “Ora di compara, compara ‘appel’ cu ‘appel’”. Esaki tabata e expression di prome minister Evelyn Wever Croes contra e presidente di sindicato SIMAR, Josephine Albertus. E ultimo a pone un ‘post’ riba su propio pagina di Facebook den fin di siman unda cu e ta cuestiona e cantidad di trahado cu ta traha pa prome minister di Aruba, compara cu otro paisnan, y ta mustra un cantidad di ehempel. Segun Albertus, ‘tin espacio pa baha mas gasto! y ta sigui mustra cifras pa defende su mes cu cifra di Aruba cu su populacion ta112.839 (31 mrt 2022, CBS). Segun Albertus, Minister President tin 21 trahador den su bureau”. Despues e ta compara Hulanda: “ HULANDA, Populacion: 17.735.617 (14 aug 2022, CBS)

Minister President tin 17 trahador den su bureau: 1 Secretaris Generaal, 1 Plv. Secretaris Generaal, 10 Raad Adviseurs, 1 Secretaris van de Ministerraad, 1 Adjunct Secretaris, 1 Beveiligings adviseur, 1 Adviseur Protocol Buitenland., 1 politieke assistent

Na Corsou cu Populacion: 151.066 (1 jan 2022, CBS)

Minister President tin 7 trahador den su bureau segun Albertus y ta sigui pa .ST.Maarten cu Populacion: 42.577 (1 jan 2021, STAT)

Minister President tin 5 trahador den su bureau. “Y ainda un hala di hende tin miedo di lanta para pa nan derecho!” e sindicalista ta sigui bisa. 

CONTESTA

E prome mandatario a contesta e sindicalista dialuna, y mande pa bay ‘informa’ su mes miho prome cu papia. E prome minister a opta pa coregi e sindicalista dialuna bisando e lo siguiente:”Sra. Josephine Albertus: ora di compara, compara ‘appel’ cu ‘appel’. Di e 21 personanan na mi ministerie, 7 ta adviseurs” e mandatario a cuminsa, y a sigui dunando ehempel di kico e ta referi na dje. “E demas ta administratief personeel/secretaresse/huishoudelijk personeel/bode/chauffeur/beveiliging. Eseynan den caso di por ehempel Premier Rutte ta cai apart di su conseheronan cu bo a menciona. “Pues si kier compara cu Hulanda of Curacao, mester compara cu e 7 adviseurs na mi ministerie. Hulanda 7, Curacao 7, Aruba 7”, e mandatario a sigui bisa.  “Ademas, mester tene cuenta cu por ehempel premier Rutte no tin carteranan manera Infrastructuur, Overheidsorganisatie, Innovatie manera ami si tin y cu mi mester di adviseurs riba e terenonan ey” e mandatario a sigui bisa.”Esaki ta djis pa aclarea. Mi ta contento cu sindicato SIMAR a bira critico, algo cu mi a haya falta di dje di 2009-2017, tempo cu ex premier Mike Eman a yega te na 400 persona riba su payroll. Sigui ta critico, y semper informa bo mes bon prome” e mandatario a finalisa bisando.