JetBlue ta elimina varios di su rutanan na 2023 incluyendo dos pa Aruba

NEW YORK – E aeroliña Mericano JetBlue Airways a anuncia varios cambio drastico den su netwerk di ruta durante fin di siman, cu ta te hasta inclui Aruba. Y NoticiaCla a compronde cu un di e cambionan a te hasta gara autoridad di aeropuerto di Aruba di sorpresa. E aeroliña a anuncia cu ta corta por lo menos 37 ruta na 2023, y entre nan e ruta di Newark y Ft Lauderdale pa Aruba, pero tambe mas otro ruta importante den Caribe. Ft Lauderdale tabata premira, segun e ehecutivo di aeropuerto di Aruba Jo-Anne Arends. “(Newark) no tabata anticipa” Arends a sigui bisa sinembargo, refiriendo riba e eliminacion di Newark. Mes momento, Arends ta sigura cu e cambio no ta uno negativo, ni pa motibo di falta di stoel. Ta simplemente un shift operacional, unda cu nan lo añadi mas ruta for di New York y Boston. Arends a confirma cu nan mes tambe lo bin cu nan anuncio mas laat awe. 

E CAMBIO

Segun e noticia di Merca, hopi di e rutanan aki tabata suspendi caba, pero awor a kita nan completo di schedulenan di futuro. E aereolina a sigura cu e cambionan ta pa ‘sigura confiabilidad operacional’. Esey a pone cu nan a anuncia e cambio di schedule pa e proximo lunanan y den 2023 cu lo extende algun di e suspencionan cu nos a implementa anteriormente e aña aki”, e aeroliña ta sigui bisa. Segun e aeroliña, e zomer aki tabata mas   resistente debi na e reduccionan den capacidad cu nan a implementa, y nan ta kere cu ta prudente pa planifica di manera similar pa e proximo aña. Lesa e articulo original AKI.