Utilities NV preparando pa otro parke di molina di biento pa Aruba

ORANJESTAD – Cu e meta pa Aruba ta completamente dependiente di energia renobable pa 2050, Utilities NV, compania madre di Elmar y WEB Aruba NV, a anuncia diabierna cu nan ta en busca di un compania pa provee un di dos parke di molina di biento na Aruba. No ta conoci si, pa cuanto molina ni na unda esaki lo mester bin. E compania cu haya e contracto, lo tin cu diseña, construi, instala, ta doño, opera y mantene e parke di molina aki. Ademas e ta keda responsabel pa bende e energia genera cu Utilities pa 15 aña largo. Den un asina yama Request for Expression of Interest, (EOI) diabierna, nan a haci e anuncio menciona.

URIRAMA 

Tabata na April di 2018 cu Gobierno a dicidi di para e proyecto di parke di molina pa wordo ubica na Urirama. Asina prome minister di Aruba Evelyn Wever Croes a informa for di Hulanda e tempo ey. “Despues di deliberacionnan extenso riba e proyecto di Urirama, Gobierno di Aruba a hala aden e hindervergunning cu a worde duna na Windpark Urirama NV” e noticia a zona. Segun e mandatario principal, ta su Partido MEP mes a bin cu e parke di molina di Vader Piet bou otro liderasgo e tempo ey. Pero nos no ta di acuerdo cu kier a sacrifica e area bunita y importante di Urirama pa e meta aki.

“Pues habitantenan di Noord especialmente den e area di Alto Vista por ta trankil. Lo no bin molina di biento asina cerca di cas y Alto Vista ta keda un area protehi caminda nos cada un por bay busca pas”. Por corda varios grupo di protesta cu a nace contra e intencion pa ubica e parke na Urirama, y casonan den corte pa bringa e permisonan necesario. 

VISION 

Wever-Croes a informa e tempo ey cu mientras tanto expertonan di nos pais lo sigui busca e mescla ideal di energia pa Aruba cu ta cumpli cu e vision di nos Gabinete Wever-Croes: Reliable Affordable & Sustainable. Gabinete Wever Croes ta sigui kere den energia alternativo. Segun Wever, vision di Gobierno actual di Aruba ta cu pueblo mester por conta riba awa y coriente sostenible y duradero. “ Pueblo mester por pag’e. Esaki ta prioridad di Gobierno di Aruba” Wever a finalisa bisando.