LaSorte: BTW cu tarifa halto ta desastroso pa inflacion di Aruba

LaSorte: BTW cu tarifa halto ta desastroso pa inflacion di Aruba

Posted on 08/10/2022 2:50 pm AST | Updated on 08/10/2022 2:52 pm AST

ORANJESTAD – Un BTW (Belasting over de Toegevoegde Waarde, of impuesto riba e balor agrega di un producto) di 14% of 18% ta desastroso riba inflacion pa Aruba. Asina CEO di Aruba Hotel & Tourism Association (AHATA) Tisa LaSorte a pone riba su pagina di Facebook, como un comentario personal. Pero un comentario pa noticiacla diaranson, a confirma cu e ta mes momento tambe e pensamento colectivo di AHATA tambe. Asina LaSorte a confirma pa e portal aki. Segun LaSorte, e hecho aki lo ta desastroso pa Aruba pasobra e inflacion ‘ta enorme caba’. Esaki ta entre 7 pa 8% actualmente segun minister di Economia Geoffrey Wever. 

 

INCENTIVO

Y segun LaSorte, si kita incentivo pa inverti, esaki lo ta ‘e ultimo clabo den economia’. E problema cu AHATA y otro gremionan tin, ta cu no tin un decision tuma ainda riba esaki, y tin asina hopi inseguridad, cu ta haci e situacion fastioso pa por planea. E unico cos cu ta sigur ‘te ainda’ ta cu BTW lo tin cu wordo introduci entrante 1 di januari 2023. A compronde cu tur cos ta cla caba, e ley ta cla for di algun luna caba, pero cu gobierno ta esun cu tin esaki wanta, pasobra e lo por crea resistencia den comunidad y no conta cu e sosten necesario cu tur su consecuencia. Algo luna atras, gremionan a haya sa cu riba un supuesto diabierna, gobierno lo mester a tuma e decision. Gobierno di su parti a confirma esey pa e portal aki, pero na final, Gobierno a hala atras y a opta pa no dicidi ainda. Pues ainda no ta conoci cua tasa lo usa y esey tin gremio hopi preocupa. Mayoria ta preocupa cu 1, e haltura di e tasa, y cu 2. e hecho cu tin no un sino dos tarifa cu lo kier introduci. Esey riba su mes lo bira un operacion imposibel pa hopi comerciante cu tin cu bay atende cu esaki unabez aña bolter. 

  • Powered by SETAR