Claudius Phillips ta gana caso contra Daury Rodriguez, cu tin cu rectifica awor!

ORANJESTAD – E ciudadano Daury Rodriguez tin 24 ora pa rectifica su declaracion difamatorio contra e musico Claudius Phillips, of ta haye ta paga un multa di 500 florin pa dia of parti di e dia te na un maximo di 25 mil florin. Esey tabata e sentencia cu Corte a dicta diaranson den e caso cu e musico a entama pa drecha su nomber relaciona cu un Facebook post contra dje. Den e post, Rodriguez ta tilda Phillips di ta un pedofiel, den cuadro di e hecho cu Phillips lo a wordo homenagea luna pasa como un musico di San Nicolas. Ta riba e post ey, Rodriguez a reacciona pa cual Phillips a dicidi di hibe corte finalmente. Finalmente pasobra e la duna Rodriguez chens pa rectifica caba, pero e ultimo aki a reta Phillips pa hib’e corte. 

E CASO

E caso tin di haber cu un sentencia bieu di aña 2011 (segun Corte) unda cu a haya Phillips culpable di tin den su poder un laptop cu porno di mucha. Esaki tabata suficiente pa e.o. Rodriguez usa esaki pa tilda Phillips awor di pedofil, basa riba e sentencia anterior. Huez den su sentencia sinembargo, a mustra cu mientras cu Phillips a haya un sentencia e tempo ey, esey no kier men cu e ta un pedofil, pasobra e no a wordo sentencia pa esey y cu e cargonan ey ta otro cos y hopi mas serio. Phillips berdad a wordo haya cu potret, pero no tin prueba of nunca e no a participa den un acto di violacion di un menor di edad. Asina huez a mustra den e caso aki y como tal, Rodriguez no tin derecho pa usa esaki contra Phillips. Berdad cu ora cu un persona exigi un rectificacion, e ta limita e otro persona su libertad di expression, pero esaki por enberdad wordo limita solamente si e ta basa riba entre otro mentira y por haci daño sin necesidad pa e otro persona. Y den e caso aki, esey tabata e hecho. Como tal, a ordena Rodriguez pa dentro di 24 ora di e sentencia, kita e post difamatorio di su pagina y publica un rectificacion, sin comentario adicional, y mester laga e rectificacion keda publica durante 2 siman di tempo. Pa cada dia of parti di dia cu no cumpli cu e veredicto, Rodriguez mester paga un multa di 500 florin te na un maximo di 25 mil florin. Por lesa e sentencia AKI.