Maduro: Gobierno lo no cobra impuesto riba tips

ORANJESTAD – Minister di Finanza Xiomara Maduro diamars anochi riba su pagina di Facebook a pone cu gobierno a dicidi cu no ta bay cobra impuesto riba tips. “E proposicion final pa Reforma Fiscal ta consisti di varios cambio y den esaki no tin cobransa di impuesto riba tips” e mandatario a bisa. “Tin varios punto cu tabata poni den e promer proposicion cu awor aki no ta aden mas y cobransa riba tips ta un di nan. E proposicion final ta wordo anuncia e luna aki” e la sigui bisa. Prome cu esey, tabatin hopi discusion riba e tema aki y ayera e mandatario a dicidi di papia y bisa kico ta kico. 

CRITICA

Hopi den comunidad, mayoria den banda di comercio, tabatin critica den sentido cu e mandatario ta tuma decisionan populista pa asina sigui sigura voto pa e proximo eleccion. Otronan si a bisa cu nan ta contento cu e decision y cu nan lo sigui sostene e mandatario den e proximo eleccion. Pues por mira cu e la ‘yuda’ genera un contento pa un grupo grandi, cu eventualmente por traduci den ‘mas voto’ pa e mandatario. Tempo lo bisa kico esaki realmente lo nifica pa e mandatario en cuestion.