Prijs di gasolin y diesel na Aruba lo baha considerablemente diaranson

ORANJESTAD – Un dia prome cu e tempo usual, Gobierno dialuna mainta a anuncia un reduccion considerable di prijs di tanto gasolin y diesel entrante 10 di augustus 2022, valido pa 4 siman. Tabata minister di Economia Geoffrey Wever cu a anuncia awe dialuna mainta durante un conferencia di prensa cu entrante diaranson awor, e prijs di gasolin y diesel lo conoce un reduccion di 42.5 cen y 32.2 cen respectivamente. Pa gasolin, esaki ta nifica cu e prijs di gasolin y diesel lo bira AWG 2.93 y AWG 2.78 respectivamente cu ta 12.7% y 10.9%. Esaki ta un reduccion considerable, compara cu e lunan anterior unda cu a conoce varios aumento considerable. E diferencia e biaha aki ta cu normalmente ta haci e anuncio aki e di dos diamars di luna, vigente pa e siguiente dia valido pa e proximo 4 siman. 

NO TA GOBIERNO

E mandatario en cuestion a sigura cu esaki no ta den control di gobierno pues cu gobierno a dicidi di reduci esaki awor, sino cu ta e mercado internacional ta determina esaki. E lo tin su debido impacto riba inflacion y ta baha e peso riba costo di bida, den e caso aki e gasolin y diesel y lo percura pa un reduccion mesora di e producto petrolero aki.