Minister Croes: Ta apoya peticion di sindicatonan pa reevalua aumento di tarifa di utilidad

ORANJESTAD – Minister Glenbert Croes a bisa 4 sindicato y OPPA durante un reunion diamars mainta cu e ta sostene e peticion di sindicatonan pa reevalua e aumento di tarifa di utilidad manera recien anuncia. Tabata awe diamars mainta cu minister Glenbert a reuni cu sindicatonan hunto cu WEB, ELMAR y Utilities riba e ahuste recien di prijs di awa y coriente.

AUMENTO

Minister a recorda cu 30 di juni ultimo WEB a anuncia aumento di tarifa di awa, cual ahuste lo a keda introduci 1 di juli ultimo. E anuncio aki no a wordo acepta pa Gobierno di Aruba y a pospone e introduccion aki. Unico motibo di esaki tabata pa yega na un tarifa mas socialisa cu un reparticion husto.

STRUCTURA NOBO

E mandatario a recorda tambe cu conhuntamente cu Minister di Economia, Geoffrey Wever, a yega na un structura nobo di tarifa pa WEB y pa ELMAR cual a wordo aproba pa Conseho di Minister. E reparticion aproba tabata social, pa esunnan di menos recurso wordo menos afecta pa e ahuste aki. Na mes momento Gobierno a dicidi cu e prijsnan nobo lo wordo reevalua dentro di 6 luna atrobe.

SINDICATONAN PREOCUPA 

Sindicatonan a expresa nan preocupacion. Awe mainta encabesa pa Minister Glenbert Croes a sinta cu sindicatonan hunto cu director di WEB, ELMAR y Utilities. E mandatario a considera e reunion hopi constructivo, fructifero y franco. E discusionnan tabata hopi abierto y franco. Di parti di Sindicatonan a haci un apelacion na WEB pa reevalua e structura nobo di tarifa pa hacie mas social ainda. E mandatario a apoya e peticion aki. WEB di su banda tambe tabata habri pa bay haci e ehercicio interno pa reevalua un structura aun mas social unda cu esunnan di menos recurso ta wordo menos afecta y mas beneficia.

Segun e minister, ningun Gobierno kier aumenta ni awa ni coriente ni gasolin. Pero e mandatario a culpa e guera di Rusia/Ukraina cu a gara mundo di sorpresa cu a ocasiona un aumento drastico na nivel mundial di prijs di petroleo. Y apesar cu desde januari ultimo WEB y ELMAR tabata pidi pa aumenta e tarifanan, e mandatario a bisa di no a permiti esaki, pasobra mescos cu e pandemia a afecta e companianan aki, el a afecta nos pueblo severamente. Apenas Aruba a drenta aña di recuperacion pa cual e mandatario kier a brinda nos pueblo e espacio pa recupera y para bek riba pia. Pero ora cu na luna di februari e guera entre Rusia y Ukrania a cuminsa, esaki a afecta solvencia di nos companianan estatal barbaremente. Asina mes e mandatario a keda pospone e aumento. Pero ta yega un momento cu como Gobernante bo mester ta responsabel den bo maneho cual ta conta pa nos pueblo primordialmente, pero tambe pa existencia di nos companianan estatal.