Alto Comisario nobo ta cuminsa traha aki dos siman na Aruba

ORANJESTAD – E proximo Alto Comisario pa Aruba Ramon Arnhem (40) ta cuminsa traha den su funcion dia 15 di augustus proximo. Asina minister di husticia Rocco Tjon a confirma pa noticiacla diahuebs mainta. Tabata na februari ultimo cu e mandatario a confirma e noticia di e escohencia di e persona aki cu ta un Hulandes di mayornan Surnameño. Desde e anuncio, no a tende nada mas y como cu a bisa cu e persona lo a cuminsa traha na juli of augustus, a dicidi di check kico ta kico. No ta conoci ki dia e lo yega Aruba si. 

KEN TA E COMISARIO NOBO

Investigacion di e portal aki, ta mustra cu sr Arnhem ta casa cu dos yiu, y ta e hefe di districto Ijselland, den provincia Overijsel. E ta maneha 800 agente policial pa un area di 500 mil persona parti den e ciudadnan Zwolle, Deventer, Kampen, Steenwijk, Ommen y Staphorst. E ta un di e poco hendenan di ‘color’ na cabez di e cuerpo y ta considera su mes un AfroHulandes  cu raiz den Africa, sur America y Europa. Aunke cu e tabata minoria den su ciudad, e la pasa bon tempo toch. Enseñansa no tabata su punto di mas fuerte, y su trayecto educacional tabata uno largo pero cu finalmente toch a paga. Despues un hubentud turbulento y  trompeca hopi, finalmente e la logra caba su estudio na Universidad di Amsterdam y a bira sociologo. E carera di polis e tin danki na su welo surnameño, cu e kier a sigui semper den funcion. Un passion di dje ta boxeo, unda cu na comienso e la hera core bay pa esaki. Na final e la sigui y bira campeon boxeo cu sigur ta un logro grandi p’e, considerando su pasado. Awe, cu e titulo di drs, e ta maneha un cuerpo di polis, ta kere den inclusion y ta bira e proximo hefe di polis na Aruba. Potret cortesia destentor