BCA: Cantidad di placa den circulacion na Aruba a baha

ORANJESTAD -  Den mei 2022, e cantidad di placa den circulacion a baha cu Afl. 43,5 miyon te na Afl. 5.378,9 miyon, compara cu april 2022. Asina e ultimo relato di Banco Central di Aruba a informa diahuebs. E echo aki a resulta for di un bahada den e activo domestico netto (-Afl. 80,0 miyon) y un crecemento den e reserva di divisa netto (+Afl. 36,4 miyon). 

E reduccion den e activo domestico netto a wordo causa pa un bahada den credito domestico (-Afl. 103,8 miyon) y un aumento den transaccionnan no relata na credito (+Afl. 23,9 miyon). E caida den credito domestico a wordo causa dor di un cambio di credito bancario netto pa un debe netto na e sector publico (-Afl. 96,9 miyon) y menos credito bancario na e sector priva (-Afl. 6,9 miyon). E bahada den credito bancario netto na e sector publico ta wordo atribui na un subida den deposito di gobierno (+Afl. 97,0 miyon). E caida den credito bancario na e sector priva a wordo causa pa menos credito na empresa (-Afl. 5,4 miyon) y consumidor (-Afl. 4,3 miyon), y mas credito na hipoteca pa vivienda (+Afl. 2,9 miyon).   

Na mei 2022, e subida den e reserva di divisa netto a wordo causa pa compra netto di divisa di Afl. 293,2 miyon di publico, principalmente relaciona cu entrada for di turismo. Esaki a wordo pa gran parti mitiga pa benta netto di divisa di Afl. 256,8 miyon na publico, primordialmente relaciona cu pago pa importacion.

INFLACION

E nivel general di prijs, cu ta wordo midi door di e indice di prijs di consumo, a registra un subida di 5,2 porciento den e luna di mei 2022, compara cu 4,7 na april 2022. E contribuyente principal na e aumento aki tabata e categoria “transporte”.  Pa loke ta trata e promedio anual di e tasa di inflacion, esaki a registra 3,0 porciento na mei 2022, compara cu 2,6 porciento na april 2022. 

ENTRADA DI GOBIERNO

Entrada total di gobierno a suma Afl. 159,0 miyon na mei 2022, cual ta Afl. 50,9 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 58,6 miyon) y un bahada den entrada no relata na impuesto (-Afl. 7,7 miyon). 

E aumento den entrada di impuesto a wordo causa principalmente pa mas entrada for di impuesto riba ganashi  (+Afl. 47,9 miyon), riba e asina yama “turnover tax” (B.B.O.,B.A.V.P.) (+Afl. 5,1 miyon), y riba salario (+Afl. 2,7 miyon). 

TURISMO

Na mei 2022, e cantidad di turista a registra 91.403 turista, cual ta 20.720 mas bishitante (+29,3 porciento) compara cu na mei 2021. E mercadonan Norte Americano, Latino Americano, y Europeo a subi cu 11.276 bishitante (+17,9 porciento), 5.302 bishitante (+299,2 porciento), y 4.523 bishitante (+148,1 porciento), respectivamente.