Aunke cu Hulanda a bisa no atrobe, Aruba ta paga 5% toch!

DEN HAAG – Aunke cu Hulanda diaranson atrobe a bisa Aruba cu no ta aproba e pago di 5% di e parti revoca bek na e empleadonan publico, Aruba a dicidi despues cu nan ta pag’e toch. Asina prome minister Wever a bisa for di Hulanda. “Mi a caba di sali di reunion cu Secretario di Estado Alexandra van Huffelen. Mi a haci tur lo posibel pa convenc’e, sinembargo mi no a logra” e mandatario a bisa diaranson for di Hulanda. For di Hulanda mientrastanto, vocero di BZK a confirma na Noticiacla un rato despues cu Hulanda enberdad no a cambia di posicion di RMR tuma diabierna ultimo. “ Mi por referi bo na e ultimo RMR. E punto di bista di Hulanda no a cambia” e vocero a bisa. Ora cu a puntra mas, e vocero a sigui bisa “ Den e ultimo RMR di diabierna ultimo, Hulanda a bisa no tambe” e vocero a finalisa bisando. E no a bay riba e contenido mas, y ki consecuencia esaki tin, esta cu Aruba a ‘desobedece’ for di Hulanda.   

MINISTER PRESIDENT

Despues cu e mandatario a haya un no di Hulanda, a dicidi pues pa paga toch. “Mi a consulta cu Conseho di Minister na Aruba inmediatamente despues di e reunion. Conseho di Minister sinembargo no por warda mas. E situacion na Aruba ta hopi dificil. Costo di bida a aumenta debi na e guera di Ukraina. Empleadonan ta entrega desde 1 di mei 2020. Gobierno a cumpli cu tur tur condicion. Hulanda no kier pa Parlamento cambia e ley pero esey ta contra nos principio di democracia parlamentario” e mandatario a bisa. “Ademas, mira e cambio den su proporcionalidad: Aruba tin un maximo pa tur salario. Esnan cu wordo emplea entrante 1 di augustus tin un maximo di 130% di salario di e minister president. 329.000 florin pa aña. Esey ta e ley di Wever-Croes Norm. Pa loke ta e 7 personanan cu ta gana mas cu e norma, nan tin 5 aña pa baha nan salario te na e maximo. 5 aña ta un periodo rasonable pa e transicion” e mandatario a sigui bisa. 

E mandatario a sigui bisa cu e ley tey. E reglanan tey. “Abusonan no por tuma luga mas. Pues nos a cumpli cu e esencia di e ley. Loke sigur no ta husto ta pa casi 5000 mama y tata di famia cu ta traha den Gobierno, den fundacionnan y den companianan estatal wordo perhudica pa esaki” e mandatario a sigui bisa. 

“P’esey, Conseho di Minister a dicidi pa paga e 5% na empleadonan publico y semi publico entrante fin di e luna aki” e mandatario a sigui bisa. “Cu esaki nos ta spera cu por yuda pa cu e costo di bida halto na Aruba causa pa e guera di Ukraina. “Gobierno ta carga su responsabilidad y lo keda na mesa cu Hulanda y sali di e empase cu nos ta den.Nos ta gradici sindicatonan pa nan lucha. Y nos ta gradici empleadonan pa nan sacrificio y solidaridad” e mandatario a finalisa bisando.