Wever: Gobierno prepara pa paga 5% e siman aki, pero Hulanda ta dicidi finalmente

ORANJESTAD – Gobierno ta completamente prepara pa paga e 5% di salario acerca manera a haci e promesa na e sindicatonan. Pero premier Evelyn Wever prome cu subi avion pa Hulanda diamars atardi, a bisa cu tur cos ta depende di Hulanda. “Mi inzet ta bai ta pa convence Hulanda pa permiti nos paga pasobra e hendenan tin mester di dje” e mandatario a bisa. Mientrastanto noticiacla tin informacion cu tur cos ta cla pa e pago extra wordo pasa e siman aki riba salario di e trahadonan. Basa riba esey, a puntra e mandatario si esey ta berdad, y si esey kier men cu ta paga e placa con cu bay bin. E mandatario a confirma esaki pa loke ta e parti cu nan ta prepara pa paga e siman aki:“ Nos tin tur cos prepara”. Pero, e mandatario a recorda, cu aunke tur cos ta prepara, tur cos ta depende di Hulanda. “Pero ta depende di e reunion cu van Huffelen mayan” e mandatario a finalisa bisando. E mandatario ta topa cu van Huffelen diaranson mes, y ta e intencion pa convence e mandatario Hulandes pa duna aprobacion. Si esey tuma lugar, e mandatario tin cu manda un solo mensahe pa Aruba y e siman aki e pago por wordo haci. Si e no haya e ‘greenlight’, e pago no por wordo haci. E mandatario tin pensa pa keda Hulanda pa 2 siman, unda cu e lo combina e biaha di trabou aki cu un vacacion cortico. 

RMR

Siman pasa diabierna e mandatario Hulandes a bisa cu RMR no a bay di acuerdo ainda pa e 5% debi cu Aruba no a cumpli cu palabracion haci cu RMR cu ta e ley di Normering Topinkomens manera palabra cu Hulanda. Parlamento di Aruba via un amienda a opta pa adapta esaki, causando iritacion cerca Hulanda. Y pesey Aruba no a haya permiso pa paga e suma aki.