Analisis: Van Huffelen a confirma cu a trata tema di 5% di salario diabierna den RMR

Manera ta conoci, Gobierno di Aruba diabierna atardi ultimo a produci un ‘voicenote’ di e secretario di estado Hulandes Alexandra van Huffelen, unda cu ta scucha e mandatario confirma e informacion di noticiacla di algun ora prome, cu RMR a trata e tema di 5% di recorte di salarial. Ningun momento e portal aki a pretende cu e tema tabata riba agenda, sino cu e la wordo trata solamente. Y e informacion aki sinembargo varios minister local a opta pa desmenti algun ora prome, den un intento pa mustra cu e portal aki lo ta gaña y kier crea caos. E interesante di e voice note ta cu e mesun gobierno algun ora prome a tillda e portal di suministra informacion incorecto y crea caos. Sinembargo, den e voice note, pa cuminsa, e mandatario Hulandes ta bisa cu , -contrario na e  declaracion anterior di gobierno tocante e tema di 5% -,  a  trata varios tema y entre e temanan trata, tabatin e peticion di Aruba pa kita e 5% di recorte di salario. NoticiaCla nunca a bisa den su raportahe cu e tema tabata riba agenda, sino simplemente cu a trata esaki e mainta ey. Gobierno di Aruba a bay asina leu di desmenti esaki anteriormente den un comunicado  , bisando cu ningun di e temanan (e otro tabata e peticion pa sosten di likides) a keda trata. 

DESAPROBA VS NO APROBA 

E unico diferencia di e relato di noticiacla, ta cu e relato ta papia di ‘desaproba’ mientras cu esaki por wordo interpreta den varios forma. Esta cu no a vota pa e punto ey cu defacto kier men cu a desaproba e punto. Pues aki, enberdad por tin confusion, y por a haci esaki den e forma di interpretacion y e angulo den cual esaki ta bisa. Pues, enberdad no a desaproba e punto aki, pero e critica y acusacion publico di e tres mandatarionan di Aruba contra e portal aki, ta draai rond di e hecho cu segun nan; 1, no a trata e tema, y 2, noticiacla a haci mencion di e tema LNT, siendo cu esey sigur no ta e caso y cu  a  menciona esaki simplemente como ‘e motibo pa cual no por aproba e asunto di 5%,’ pero no cu e tema ey specificamente a keda trata, manera cu e minsternan a pretende.  

KICO A WORDO BISA

Loke a pasa diabierna mainta ta cu e portal aki a puntra e vocero di BZK, si RMR a trata e asunto di 5% y cu si tabatin decision. E contesta tabata: ‘Si, y e secretario a splica cu e momento aki no por bisa si (esta aproba:red) riba esaki pasobra (Aruba:red) no a cumpli cu e condicionan palabra cu RMR”. Por interpreta esaki e ora como cu enberdad no a aproba e punto aki. Y den e mensahe textual, e vocero ta confirma cu enberdad ‘a trata e asunto’. Y ora cu noticiacla a specificamente puntra e vocero kico tabata e motibo cu no por aproba e asunto, e vocero a bisa cu  esaki ta pasobra Aruba no a cumpli cu e palabracion cu RMR riba e ley di Normering Topinkomens (LNT). Ta aki ta unda e tema di LNT a bin na discusion prome biaha. Algo cu e mandatario den su voice note tambe a confirma “Nos a bisa cu nos no a tuma decision definitivo pasobra falta informacion” e mandatario a bisa, alegando tambe e disputa cu tin cu CAFt riba e presupuesto di 2022. Cu lo tuma decision despues, ta un hecho, pero tambe cu e diabierna ey a opta pa no aproba esaki. Esaki kier men cu si Aruba cambia e ley bek, e ora por aproba e pago di 5%. A lo menos cu Hulanda awor bin cu un otro acuerdo cu Aruba unda cu ta dicidi pa aproba e 5% toch, usando otro areglo.  Pues ta mira cu Noticiacla a papia e berdad riba e tema. Por debati riba e palabra no aproba y desaproba, pero ta keda un hecho cu e diabierna ey, a opta pa no vota riba dje, pasobra tabata falta informacion. 

PRUEBA

Ora cu e mandatarionan di Aruba a cuestiona e portal aki y pidi pa prueba, e portal a informa e mandatarionan cada un cu no tin problema pa mustra nan esaki, ter inzage’ pero no pa manda esaki electronicamente. Esaki debi cu den un incidente anterior, cos a bay robez cu un voicenote cu a wordo manda cu aprobacion, pero cu a wordo mal usa y gespinned negativo contra e portal aki. Den e app di diabierna mainta,  e vocero ademas a duna noticiacla luz berde pa cit’e, cu ta loke cu e portal a haci tambe y tabata tur e prueba necesario pa verifica e noticia. Pa esnan cu ainda no kier kere, ta keda na nan, incluyendo e mandatarionan cu a opta pa publicamente cuestiona e portal aki.  Manera ta conoci noticiacla semper ta para tras di su publicacionan, cu prueba, manera e caso aki, y den e caso aki esey no ta diferente. Si ministernan kier purba desacredita e portal, ta keda pa nan responsabilidad. Wak e video di secretario di estado van Huffelen riba e tema AKI. Skirbi pa Tito Laclé.