Parkinglot dilanti Bestuurskantoor ta mahos bista y peligroso

ORANJESTAD – E parkinglot cu ta cuminsa dilanti Renaissance Cinemas y sigui dilanti Parlamento y Bestuurskantoor, ta den un estado asina deplorable, completo cu buraconan grandi cu a pone cu e personal di hotel ey dilanti, esta Renaissance Hotel mes mester a saca un man pa drecha esaki, prome cu sosode un incidente. E ta un propiedad di gobierno pa cual DOW ta responsabel pa su mantencion. Pero mirando cu e lugar ta asina deteriora, e siman aki e personal di e hotel a opta pa no warda mas y nan mes purba yena algun di e buraconan pa evita cu nan hendenan sea trahado of clientenan y eventual turista bishitante herida nan mes. Asina tin mas caminda cu ta den pleno bista di turista, cu mester di un capa completo, pero cu no ta hayando e atencion. No ta conoci si ta placa ta e problema, of prioridad. Pero tabata notable den centro di ciudad cu e situacion tabata dje horendo cu mester a haci algo.