Wever Croes: Aruba a sali number dos den Caribe pa loke ta evaluacion di CFATF

ORANJESTAD - Recientemente Aruba a pasa door di evaluacion di e instituto caribense, Caribbean Financial Action Task Force (CFATF) cu excelencia. Asina Prome Minister Evelyn Wever - Croes a expresa diabierna mainta y cu e ta sumamente orguyoso di trabou eherci door di instancianan na Aruba di sector publico, semi publico y priva.

Segun e mandatario, diahuebs Gobierno di Aruba a ricibi e informacion cu Aruba tin un regimen di AML/CFT excelente. Cual ta algo cu Aruba mester ta hopi orguyoso di dje. Prome Minister a splica cu desde 2017 cu ta den Gobierno, ta trahando cu un stuurgroep AML/ CFT cual ta lidera door di Prome Minister Wever - Croes, hunto cu profesionalnan cu ta asisti Gobierno den esaki. Enfoke di e stuurgroep ta riba e tema di labamento di placa y financiamento di terorismo. Pues e evaluacion excelente cu Aruba a ricibi ta bin di esfuerso grandi di e profesionalnan di sector publico, semi publico y di sector priva.

PROCESO DI PREPARACION PA E EVALUACION 

Na aña 2018 te cu 2020 a conduci un “National Risk Assesment” di labamento di placa y terorismo akinan na Aruba. E ta un metodologia di World Bank, pa haci evaluacion di e riesgonan di labamento di placa of financiamento di terorismo na nivel nacional. Pues esaki a haci entre 2018 y 2020 cu sector publico y sector priva. Tur esaki den preparacion pa e evaluacion. Adicionalmente a cambia e ley ‘Landsverordening voorkoming witwassen en terrorisme financiering (LWTF)’ na 2021.

Prome Minister Wever - Croes a splica cu preparacion pa e evaluacion a cuminsa na aña 2018 y mester a haya e evaluacion na 2020, pero esaki a wordo posponi debi na Covid. Durante di e periodo aki Aruba mester a manda hopi informacion pa CFATF. Mester a documenta e leynan y con ehecusion den practica ta dirigi pa combati labamento di placa y financiamento di terorismo. Despues di esey, e grupo mes di CFATF cu a evalua Aruba, a bin Aruba pa haci ‘on-site visit’ den e periodo di 30 di augustus te cu 10 di september 2021. E assessment team aki a reuni cu tur e stakeholders di sector publico y priva, pa scucha con e practica ta, y si esey ta di acuerdo cu e documentonan cu a manda prome y evalua si esey ta suficiente. Unabes cu e ‘on-site visit’ a keda cla a sigui e proceso di e rapport mes. E rapport a wordo traha den concepto basa riba locual e assesment team a traha y el a wordo manda Aruba pa repasa. Despues tabatin reunion riba e contenido pa asina trata e conclusionnan di e assesment team. Esaki a tuma luga durante e lunanan mei y juni 2022.

APROBACION DI E RAPPORT

Premier Wever - Croes a splica cu 2 di juni tabatin e reunion plenario via Zoom y e orey e rapport a wordo aproba. Despues di esaki nan a repasa e calidad y consistencia internacionalmente caminda ta compare cu otro paisnan similar. E resultado di esaki ta, cu ningun otro pais tabatin nada mas di añadi na e rapport y asina e rapport a wordo aproba pa loke ta calidad y consistencia tambe.

RESULTADO DI EVALUACION 

Aruba a sali number dos den henter Caribe pa loke ta e evaluacion di CFATF. E pais Bermuda a sali number uno den e evaluacion. 

Ta mira cu varios otro pais den Caribe tin problema pa pasa e evaluacion, pues e resultado di Aruba ta uno cu ta sumamente orguyoso di dje, danki na e trabou cu a wordo haci door di tur e instancianan publico, semi publico y sector priva.