- Presion di CAFt a pone gobierno kita 16 miyon pa RWZI di e prespuesto
- Presentadora di television Hulandes a tende di su Condecoracion Real mientras cu e ta na Aruba
- Condecoradonan a ricibi nan ‘cinta’ pa nan esfuerso y dedicacion boluntario na pais Aruba
- Conocido presentadora di programa Sinterklaas Journaal mester laga amputa su nanishi
- Cantidad di hende condecora na Corsou ta hopi menos cu Aruba e aña aki
PG: Tin instruccion nobo pa procedimiento penal ora di delitonan sexual
ORANJESTAD - Procurador-general di Aruba a saca dos instruccion (richtlijn) nobo recientemente. Instruccionnan ta encera reglanan pa investigacion y persecucion di hechonan castigable.
Recientemente e instruccion entrante Procedimiento penal ora di delitonan sexual a drenta na vigor. E instruccion ta encera e puntonan di salida y cuadronan na cual un investigacion di un delito sexual mester coresponde. Pa un persecucion resulta exitoso ta hopi importante cu e instruccion aki wordo usa den tur caso di delito sexual.
Delitonan sexual ta violacionnan serio di e integridad fisico y mental di un persona. E casonan aki ta afecta profundamente e bida di un victima y demas personanan envolvi y ademas, hopi biaha, ta hiba tambe na gran conmocion den comunidad di Aruba. Ministerio Publico mester tene cuenta cu e interesnan di tur esnan envolvi. Un investigacion semper ta dirigi riba busca e berdad y esey ta exigi cu e investigacion, e persecucion y e ehecucion di e castigo mester wordo haci na un manera hopi ciudadoso. Cu mester trata cuidadosamente ora di busca e berdad ta e motibo principal pa bin cu e instruccion.
Den e instruccion aki tin (entre otro) e puntonan di salida di un investigacion, e puntonan di salida pa cu un victima menor di edad y pa cu un victima mayor di edad, e exigencianan di castigo dividi segun categoria y e lista di factornan/circunstancianan cu por ta di influencia riba e exigencia di castigo. E instruccion a drenta na vigor riba 4 di juli ultimo.
VERBALISA BAO NUMBER
Banda di e instruccion entrante Procedimiento penal ora di delitonan sexual, a introduci tambe e instruccion entrante Verbalisa bao number pa opsporingsdiensten.
Sa sucede cu opsporingsdiensten ta haci investigacionnan cu ta asina delicado, cu pa agentenan cu ta traha e proces-verbaal ta importante pa nan keda anonimo. Sigur den un sociedad chikito manera Aruba, e nomber di un verbalisant bao di un proces-verbaal por hiba na repercusionnan pe of pa su famia.
Cu e instruccion aki, Procurador-general di Aruba ta establece reglanan adicional tocante e forma riba cual proces-verbaalnan mester wordo firma di awor pa dilanti. E instruccion aki lo drenta na vigor riba 8 di augustus venidero.
Riba website di Ministerio Publico e instruccionnan a keda publica. (https://omaruba.com/richtlijnen/) Banda di e instruccionnan e jaarverslagnan tambe a keda publica. (https://omaruba.com/jaarverslagen/)
Doño di cacho abusa ‘Khaleesi’ ta dilanti huez fin di mei
ORANJESTAD – E persona doño inicial di e cacho Blacky cu a haya e nomber despues di Khaleesi, mester presenta dilanti huez dia 22 di mei proximo. Asina corte a informa diahuebs ultimo. Ta trata di e ciudadano Alberto Groeneveld. Ora cu e caso a bira conoci, esaki a haya masha hopi reaccion di comunidad, cu a desemboca finalmente den un caminata di protesta contra maltrato di bestia. Groeneveldt ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
Ultimatum pa dicidi riba suma cu radionan mester paga DUCAPRO tur luna, a vence sin resultado
ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.
Otmar Oduber: Testigo principal pa defensa den caso Flamingo no por declara dilanti Huez Comisario
ORANJESTAD – E testigo principal di parti defensa den caso Flamingo, den e caso aki, e hefe di BCI, lo no por declara dilanti Huez Comisario. Asina ex minister Otmar Oduber a declara publicamente diamars. Segun e ex mandatario, Huez Comisario a informa nan diabierna ultimo cu e motibo ta cu salud di e testigono ta permiti.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Follow NoticiaCla
