Gobierno kier bringa aanwijzing via RvS manera Corsou a bringa di dje

ORANJESTAD - Gobierno di Aruba kier bringa e posibel aanwijzing cu e por haya, basa riba recomendacion di CAFt na RMR, via Raad van State manera Corsou a bringa su aanwijzing ora cu e la haya di dje na 2019. Asina e ta mustra segun e comunicado di e minister di finanza Xiomara Maduro. E mandatario ayera a splica cu “Gobierno di Aruba di su parti lo sa di cana e caminda legal cu ta hiba pa haya un conseho na Raad van State” y cu e “ta un caminda conoci caba den Reino, ya cu poco tempo atras Pais Corsou tambe a cana e caminda aki cu exito”. 

CORSOU SU AANWIJZING

Tabata na mesun temporada (mitar di aña) 2019 cu Corsou a haya un aanwijzing di RMR pa mesun motibo, esta coreccion di e presupuesto di e aña ey. E instruccion duna na juli di 2019 tabata pa tres punto, esta mester a coregi e presupuesto segun e e norma di CFT, regla e deficit di añanan 2017 y 2018 cu surplus adkeri segun presupuestonan di 2020, 21 y 22. Y finalmente mester a caba paga e debe na SVB y Fondo di Pensioen. Riba dos di e tres puntonan, Raad van State ta haya cu Rijks Minister Raad (RMR) a faya. E unico instruccion cu ta keda para y activo ta esun unda cu gobierno di Corsou mester cumpli cu paga su debe na fondo di pensioen. 

A BRINGA ESAKI

E caso a keda trata dia 14 di november 2020   pa RvS. Durante e caso, partidonan a haya oportunidad pa trece nan punto di bista. E session a keda presidi pa Henk Lubberdink, miembro Ben Vermeulen, Paul Comenencia pa Corsou, Milly Schwengle pa Aruba y Frank de Grave e tempo ey.    

AANWIJZING TABATA ROBEZ

Despues di a trata esaki, RvS a determina cu e instruccion (aanwijzing) cu Hulanda a duna Corsou na mitar di 2019 pa adapta e presupuesto e tempo ey, no tabata corecto.  Como tal e apelacion di gobierno di Corsou tabata na su lugar. Como tal secretario di estado Hulandes e tempo ey, Raymond Gradus mester a adapta y of revoca e instruccion. 

E INSTRUCCION 

Den e caso di Aruba awor,  minister di finzanza a sigura cu dado caso cu Conseho di Minister di Reino (RMR) dicidi di duna Aruba un instruccion, Gobierno di Aruba di su parti lo sa di cana e caminda legal cu ta hiba pa haya un conseho na Raad van State y ta spera cu e biaha aki tambe RvS lo duna Aruba razon manera cu a haci cu Corsou.