RvS ta revoca aanwijzing practicamente completo duna na Corsou na 2019

WILLEMSTAD - E instruccion (aanwijzing) cu Hulanda a duna Corsou na mitar di 2019 pa adapta e presupuesto e tempo ey, no tabata corecto. Asina Raad van State a determina e siman aki. Como tal e apelacion di gobierno di Corsou tabata na su lugar. Como tal secretario di estado Hulandes Raymond Gradus tin cu adapta y of revoca e instruccion. 

E INSTRUCCION 

E instruccion duna na juli di 2019 tabata pa tres punto, esta mester a coregi e presupuesto segun e e norma di CFT, regla e deficit di añanan 2017 y 2018 cu surplus adkeri segun presupuestonan di 2020, 21 y 22. Y finalmente mester a caba paga e debe na SVB y Fondo di Pensioen. Riba dos di e tres puntonan, Raad van State ta haya cu Rijks Minister Raad (RMR) a faya. E unico instruccion cu ta keda para y activo ta esun unda cu gobierno di Corsou mester cumpli cu paga su debe na fondo di pensioen. 

E CASO 

E caso a keda trata dia 14 di november ultimo pa RvS. Durante e caso, partidonan a haya oportunidad pa trece nan punto di bista. E session a keda presidi pa Henk Lubberdink, miembro Ben Vermeulen, Paul Comenencia pa Corsou, Milly Schwengle pa Aruba y Frank de Grave.