Hulanda ta irita cu Aruba pa motibo cu Parlamento a pasa un LNT diferente

DEN HAAG – Gobierno Hulandes ta irita cu Gobierno di Aruba debi na e resultado di e Landsverordening Normering Topinkomens (LNT) cu recientemente a pasa den Parlamento. Asina fuentenan fidefigno di noticiacla na Hulanda cerca di e proceso a confirma pa e portal aki. E motibo ta cu mientras cu enberdad Parlamento di Aruba a pasa e ley recientemente (cu ta un di e condicionan cu Hulanda a pone pa Aruba por cuminsa elimina e recorte salarial), loke cu Parlamento a haci, ta cambia e suma di e top, pa medio di un amienda unda cu envez di 261 mil pa aña, e cantidad cu un director por gana maximo awor, ta 329 mil florin. 

NO PALABRA

Y e suma ey, no ta loke cu a palabra Aruba a palabra cu Hulanda. Pues, a pasa e ley, pero no loke tabata e acuerdo. Y esaki a pone cu Hulanda no a aprecia e asunto nada nada, pasobra esaki por afecta e confiansa entre e dos paisnan aki, cual confiansa ya tabata basta malo y cu ultimo tempo a bin ta drecha.  

CAFT Y LAFT

Esaki ta un sabor amargo pa Hulanda, debi cu ta netamente pa e motibo aki, esta e confiansa aki, Aruba a haye cu un RAFT (Rijkswet) envez di un Landsverordening (LAFT) pasobra biaha pasa caba Parlamento contra palabracion entre Gobierno di Aruba y Hulanda, a bay cambia esaki, creando iritacion pa banda di Hulandesnan, pasobra Parlamento a cambia e palabracion cu tabatin entre Aruba y Hulanda. Esaki ta mustra pues cu historia ta ripiti atrobe, unda cu gobiernonan ta palabra algo y despues Parlamento ta opta pa cambia esaki. Esey ta e motibo principal pa cual aworaki Aruba ta confronta cu un Rijkswet pa e supervision di control financiero.

WEVER CROES

E prome mandatario di Aruba a bisa anteriormente cu e ta prefera un aumento di e norma debi cu esaki lo evita posibel casonan sumario den corte, di e directornan cu ta haya nan mes ta reduci nan salario mientras cu nan tin contractnan cera pa e suma cu nan a palabra inicialmente.  

CONSECUENCIA

No ta conoci ki consecuencia e iritacion aki lo tin pa Aruba. Ta conoci cu e paisnan ta den combersacion ainda riba e contenido pa cu COHO, pa cual tin cu bin bek hunto na augustus proximo.  Click AKI pa e ley mes, esta Landsverordening Normering Top Inkomens.