CAFt a confirma cu a ricibi contesta y ta analisando reaccion di gobierno di Aruba!

ORANJESTAD – E colegio di supervision financiero pa Aruba CAFt a confirma pa noticiacla cu nan a ricibi e contesta di gobierno riba nan ultimo reaccion. “Esaki ta wordo analisa aworaki” e colegio a sigui bisa  diabierna mainta. Awor tin cu warda wak kico CAFt lo bisa bek, y si e contesta di gobierno ta suficiente pa CAFt deshaci di e pensamento pa conseha conseho di minister di Reino riba e supuesto ‘incumplimento’ di Aruba, acompaña pa un recomendacion pa duna Aruba un instruccion. Si e ultimo reaccion di gobierno no ta suficiente, por spera e conseho negativo proximamente.

KICO A PASA

Manera ta conoci recientemente e colegio a manda un carta pa gobierno di Aruba unda cu ta bolbe ripiti cu Aruba ‘atrobe’ no ta cumpliendo cu e recomendacionan y ta apenas 1 di e 13 cu nan a manda, Aruba a haci caso di dje. Ta trata e conseho riba e presupuesto aproba pa 2022, unda cu segun CAFt, e presupuesto no ta cumpli cu e loke a palabra segun e normanan. Den e conseho ey, cu CAFt a manda, a subraya e biaha aki cu si e biaha aki no duna oido na e otro consehonan, lo no mira otro remedio, cu raporta esaki bek na RMR cu un conseho pa un aanwijzing. Gobierno di su banda a reacciona cu nan no ta mira cu tin un aanwijzing riba mesa y cu nan no ta mira a base di kico lo por duna un aanwijzing. Awor palabra ta keda na e colegio, pa tende si gobierno a logra convence nan cu tur cos haci, ta ok.