Gobierno ta cera diaranson, y tur scol diahuebs y diabierna pa mal tempo

ORANJESTAD – Gobierno di Aruba diamars merdia a anuncia cu tur scol ta cera diahuebs y diabierna, relaciona cu e disturbio cu ta biniendo den nos direccion. Ademas a anuncia cu for di diaranson merdia 12’or gobierno ta cera tur su departamentonan y ta manda tur hende cas, cu excepcion di esnan cu ta vital pa e operacion di nan departamento keda funciona. Prome minister Evelyn Wever a splica cu nos ta den codigo oraño awor y bou di e codigo ey por cera departamentonan di gobierno, pero ainda no sector priva. A haci un apelacion si pa nan tambe cera porta diaranson caba y manda nan trahadonan cas. Unabes cu e situacion bira codigo cora, e ora si gobierno tin e autoridad di cera tur cos obligatoriamente. Ta premira cu esaki ta bira e caso  mas sigur den curso di diaranson atardi.