Meteo Aruba: Ta vigilando ola tropical fuerte moviendo den nos direccion

ORANJESTAD – Servicion meteorologico di Aruba diadomingo a confirma cu e siman aki un ola tropical fuerte den parti central di laman Atlantico, por afecta nos isla e siman entrante. Mientrastanto, un ola tropical, na e momentonan aki den parti oost di caribe, lo move bai west den proximo  24 ora y lo soru pa temporalmente mas nubia pasa over di region local. Esaki lo ta principalmente den oranan di marduga, mientras cu dialuna mainta por spera un awacero pasajero te breve riba partinan di e isla cu un chance chikito pa lamper cu strena. E potencial pa awacero pa proximo 24 ora lo ta entre 1 pa 5 mm, mientras cu localmente esaki por varia. 

POSIBEL TORMENTA 

Henter fin di siman e tema di combersacion tabata e posibel tormenta biniendo den nos direccion. Ta trata di un ola tropical fuerte den parti central di Atlantico, cu ta wordo compaña pa un area di presion abou. E ola tropical aki ta wordo vigila pa desaroyo y tin un chance medio grandi den proximo 2 dia y un chance grandi den proximo 5 dia pa bira un cyclon tropical, mientras e ta move den direccion west riba awanan di atlantico central.