Desaroyadonan di Secrets Hotel lo continua cu e proyecto a pesar di tardansa

ORANJESTAD - Desaroyadonan di e hotel den construccion na Seroe Colorado, esta Secrets Hotel lo continua cu e proyecto a pesar di tardansa. Asina prome minister Evelyn Wever a sigura diabierna atardi, despues di a reuni cu nan. 

A CUMPLI CU CORTE

E mandatario a confirma cu e la ricibi representantenan di Secrets Hotel, despues di cu a para e proyecto a consecuencia di un decision di corte.  Mientrastanto mester bisa cu tur e rekisitonan a wordo cumpli cu ne pues e proyecto lo por cuminsa bek. 

TA SIGUI INTERESA 

Den e encuentro cu e desaroyado, Prome Minister a wordo informa di e bon noticia cu nan ta sigui interesa den Aruba, a pesar di e tardansa. Awo ta importante pa wak con ta atende cu e tardansa y e terminonan cu ta indica pa e proyecto. 

PROYECTO BUNITA PA PARIBA DI BRUG

E mandatario a recorda cu Secrets Baby Beach Aruba ta un proyecto sumamente importante pa Aruba specialmente pa San Nicolas, pa motibo cu e lo stimula actividad economico den e area y e lo crea cuponan di empleo pa nos propio hendenan. Esnan cu ta biba pariba di brug lo tin preferencia pa traha den e proyecto y Minister di labor lo ta encarga cu e parti aki.

LO ASISTI 

Pa conclui Premier Wever - Croes a remarca cu Gobierno di Aruba lo mira con por asisti e desaroyadonan pa e inversion aki por bira un realidad, y pa Aruba por haya e hotel na San Nicolas.