Aruba Marriott Resort a recluta 100 asociado nobo

ORANJESTAD  – “Nos ta masha contento di por a tuma riba 100 colega nobo. Pero nos no ta cla. Ainda tin como 66 posicion vacante”, asina Ruthline Tromp-Theysen, Complex Director of Human Resources na Aruba Marriott Resort & Stellaris Casino, a duna di conoce cu un sonrisa di satisfaccion riba su cara. E compleho di hotel, cu ta e dunado di trabou mas grandi di Aruba den sector di horeca, ta den necesidad di crece den cantidad di empleado. Mirando cu turismo ta mehorando tur siman y cu e grado di ocupacion na e compleho di hotelnan Marriott na Aruba ta creciendo, cu awor mas cu nunca nan ta den necesidad di mas asociado. Ta reclutando coleganan nobo pa traha den e hotelnan.

FALTA TRAHADO DEN HOUSEKEEPING

Pero, di tur e posicionnan, como mita di nan, esta 30 posicion, ta den area di housekeeping. Y ta precisamente ey e compleho di hotelnan Marriott y otronan tambe, tin un reto pa por haya trahado. Tin un percepcion robes pa e trabou specifico ey. E trahadonan den e departamento di housekeeping tin un bon salario, en todo caso riba salario minimo. Como cu e trabou no ta facil, nan tin dos dia liber pa siman. Nan ta haya un sin fin di incentivonan pa cumplimento y ora surpasa expectativa di trabou.

PROCESO DI RECLUTACION FACIL Y LIHE

Entre e prome shen asociadonan nobo na e hotel, nan a confirma cu e proceso di reclutacion a bay masha facil y den algun dia a haya contesta caba pa nan por a atende na un reunion y asina a bin keda cla cu nan trabou. Eyden ta traha den forma di ekipo, basa riba e cultura di Marriott cu ta enfoca riba brinda e turista un experencia di calidad halto. E coleganan nobo a gusta tambe e forma con ta brinda oportunidad di crecemento den e compania.

TRABOU TIN, TRAHADO MESTER!

Ruthline Tromp-Theysen a sigura cu ta intencion di Aruba Marriott Resort & Stellaris Casino pa recluta mas empleado local cu ta posibel. El a enfatisa cu si bo a solicita y a haya un carta bisando cu nan no a tuma bo den e funcion, pa bo no descurasha. Tene cuenta cu tin biaha, den cierto posicion, ta un of dos asociado nan mester, pero ta haya riba shen solicitud aden. Di mes e ora cu 98 hende lo haya un carta yamando danki pa solicita pero cu otro hende a haya e trabou. Den caso asina, yama Marriott toch, sigui solicita den otro funcionnan pasobra ta hopi trabou tin disponibel na e momento aki.  

MAS DETAYE, MIHO 

Na Aruba Marriott resort & Stellaris Casino nan a haya riba cinco mil aplicacion pa trabou e ultimo simannan aki. E berdad ta cu, lamentablemente, hopi aplicacion ta cay afo pa falta di suficiente informacion pa por solicita na un trabou. Por ehempel ta yena nomber y fam pa ki posicion ta solicita pero no ta manda un CV, cu diploma, cursonan, experencia na otro trabou, etc. Mester realisa cu den caso asina, esunnan cu si a yena e aplicacion completo, tin mas chens pa subi e lista di asociado. Tambe ora di bin solicita, no por bisti ni slordig, ni sexy, tampoco cu t-shirt cu palabra malo riba dje of presenta un actitud di no kier traha.